អាជ្ញាធរក្នុងតំបន់ នៅថ្ងៃអង្គារ (ទី៣០ ខែកក្កដា) នេះ បានឲ្យដឹងថា កម្មករអណ្តូងរ៉ែធ្យូងថ្ម ៥នាក់ បានស្លាប់ បន្ទាប់ពីមានហេតុការណ៍បាក់អណ្តូងរ៉ែមួយ នៅភាគខាងជើងប្រទេសវៀតណាម។

គណៈកម្មាធិការប្រជាជនខេត្ត បានឲ្យដឹងនៅក្នុងសេចក្តីថ្លែងការណ៍មួយថា ឧបទ្ទវហេតុនេះ បានកើតឡើងកាលពីថ្ងៃចន្ទ (ទី២៩ ខែកក្កដា) នៅឯអណ្តូងរ៉ែធ្យូងថ្ម ក្នុងខេត្ត Quang Ninh ដែលជាតំបន់ជីកយករ៉ែធ្យូងថ្មដ៏ធំបំផុតរបស់ប្រទេស។

សេចក្តីរាយការណ៍របស់ប្រព័ន្ធផ្សព្វផ្សាយរដ្ឋ នៅថ្ងៃអង្គារនេះ បានរាយការណ៍ថា ជនរងគ្រោះទាំងអស់ ដែលជាបុរសមានអាយុចន្លោះពី ២៣ឆ្នាំ ទៅ ៤៧ឆ្នាំ គឺជាបុគ្គលិកនៃក្រុមហ៊ុនរុករកធ្យូងថ្មរបស់រដ្ឋ Vinacomin។

ក្រុមហ៊ុន Vinacomin មិនអាចទាក់ទងបានភ្លាមៗនោះឡើយ ដើម្បីសុំការអត្ថាធិប្បាយ ជុំវិញហេតុការណ៍នេះ។ គណៈកម្មាធិការខេត្ត បាននិយាយថា ការស៊ើបអង្កេតរកមូលហេតុនៃឧបទ្ទវហេតុនេះ កំពុងដំណើរការទៅ៕