​បាល់ទាត់៖ ​ក្រុមបាល់ទាត់​ជំរើសជាតិ​អូ​ម៉​ង់បានធ្វើ​រឿង​គួរឱ្យភ្ញាក់ផ្អើល​មួយ តាមរយៈ​ជ័យ​ជំនះ ១-០ នៅលើ​ទឹកដី​ជប៉ុន​ក្នុងការ​ប្រកួត​ជំ​រុះ World Cup ២០២២ នៅ​តំបន់​អាស៊ី​។

​​ក្រុម​ជប៉ុន​ចាប់ផ្តើម​ដោយមាន​ឱកាស​មុន​តែ​ការ​ស៊ុត​របស់ Junya Ito នៅ​នាទី​ទី២៨ មិនបាន​សំរេច មុនពេល​ដែល​អូ​ម៉​ង់​មានឱកាស​បាល់​ពិន័យ ១១ម៉ែត្រ ១ តែ VAR លុបចោល​ការសំរេចចិត្ត​របស់​អាជ្ញាកណ្តាល​ដំបូង​។ ​​នៅ​វគ្គ​ទី២ នេះ​ជប៉ុន​នៅតែមាន​ឱកាស​ច្រើន​ទៅលើ​ក្រុម​ភ្ញៀវ​តែ​ជាថ្មីទៀត​ការប៉ុនប៉ង​របស់ Yuya Osako ត្រូវបាន​ជួយសង្គ្រោះ​ដោយ​អ្នកចាំទី​។ ​​ហៀបនឹង​ចប់​ការប្រកួត​ទៅហើយ ​អូ​ម៉​ង់​បែ​ជា​រក​គ្រាប់​បាល់​ជ័យជំនះ​បាន​ទៅវិញ​នៅ​នាទី​ទី៨៨ ដោយ Issam Al Sabhi​។ ​​នេះ​ជាការ​ចាប់ផ្តើម​ដ៏​អាក្រក់​មួយ​សំរាប់​ជប៉ុន​នៅក្នុង​វគ្គ​ជំ​រុះ​ជុំ​ទី៣ ក្នុង​តំបន់​អាស៊ី​នេះ ​ដែល​ជប៉ុន​ស្ថិតក្នុង​ពូ​ល B ជាមួយនឹង​អូ​ម៉​ង់ អូស្ត្រាលី ចិន វៀតណាម និង​អារ៉ាប៊ីសាអ៊ូឌីត​។

​​ងាក​មក​ទស្សនា​ការប្រកួត​មួយទៀត​នេះ​ ក្រុម​ជំរើសជាតិ​វៀតណាម​បង្ហាញខ្លួន​លើកដំបូង​ក្នុង​វគ្គ​ជំ​រុះ​ជុំ​ទី​៣ នេះ​ដោយ​ធ្វើដំណើរ​ទៅ​ទឹកដី​អារ៉ាប៊ីសាអ៊ូឌីត​។ ​​ក្រុម​ចំនូល​ថ្មី​នៅ​វគ្គ​នេះ​វៀត​ណាម​មានឱកាស​នាំមុខ​មុន​តាំងពីដើម​វគ្គ​ទី១ ដោយ Nguyen Quang Hai នៅ​នាទី​ទី៣ តែ​វៀតណាម​ក៏​បាត់បង់​កីឡាករ​ម្នា​ក់នៅ​វគ្គ​ទី​២ ដោយ​កាត​លឿង​ទី​២ លើ Do Duy Manh ខណៈ​អារ៉ាប៊ីសាអ៊ូឌីត​ស៊ុត​បាល់ ១១​ម៉ែត្រ​បាន​សំរេច​ដោយ Salem Al Dawsari​។ ​​គ្នា​ច្រើនជាង ក្រោយមក​ក្រុម​ម្ចាស់ផ្ទះ​រក​បាន ២​គ្រាប់​ជ័យជំនះ​របស់ខ្លួន​ដោយ Yasser Al Shahrani និង​បាល់ ១១​ម៉ែត្រ​មួយ​គ្រា​ប់​ទៀត​ដោយ Saleh Al Shehri​។

​​ចំណែកឯ​អូស្ត្រាលី​បាន​បើក​ទំព័រ​ជុំ​ទី៣ របស់ខ្លួន​ដោយ​យកឈ្នះ​ចិន ៣-០ តាមរយៈ​ ៣​គ្រាប់​ដោយ​កីឡាករ​បីនាក់​រួមមាន Awer Mabil, Martin Boyle និង Mitchell Duke​។ ​​បី​ពិន្ទុ​នេះ​ធ្វើឱ្យ​អូស្ត្រាលី​ឡើងឈរ​លេខ ១ ក្នុង​ពូ​ល B នេះ​ខណៈ​ប្រកួត​បន្ទាប់​អូស្ត្រាលី​ត្រូវ​ទៅផ្ទះ​វៀតណាម, អារ៉ាប៊ីសាអ៊ូឌីត​ទៅ​ទឹកដី​អូ​ម៉​ង់៕

អត្ថបទ​៖​នាង សុភា​វុ​ធ