ក្រសួងការពារជាតិ បាននិយាយនៅថ្ងៃអង្គារនេះថា តុលាការយោធាមួយ បានចេញដីកាចាប់ខ្លួនមន្ត្រីម្នាក់នៅបញ្ជាការស៊ើបការណ៍សម្ងាត់របស់យោធា ពីបទធ្វើឲ្យលេចធ្លាយព័ត៌មានរបស់ភ្នាក់ងារចារកម្មកូរ៉េខាងត្បូងដែលកំពុងប្រតិបត្តិការ នៅក្រៅប្រទេស។

មន្ត្រីស៊ីវិលនៅទីបញ្ជាការស៊ើបការណ៍សម្ងាត់ការពារជាតិកូរ៉េខាងត្បូង ដែលត្រូវបានដកហូតអត្តសញ្ញាណប័ណ្ណ ត្រូវបានគេសង្ស័យថា បានផ្តល់ព័ត៌មានផ្ទាល់ខ្លួនរបស់ភ្នាក់ងារចារកម្ម ទៅឲ្យជនជាតិចិន ដែលមានដើមកំណើតកូរ៉េ។

ភ្នាក់ងារចារកម្មនិយាយសំដៅលើមន្ត្រីស៊ើបការណ៍សម្ងាត់ ដែលធ្វើសកម្មភាពចារកម្ម នៅក្រៅប្រទេសប្រឆាំងនឹងកូរ៉េខាងជើងជាមួយនឹងអត្តសញ្ញាណក្លែងបន្លំរបស់ពួកគេ។

អាជ្ញាធរយោធា ត្រូវបានគេជឿថា បានរកឃើញសញ្ញាដែលលេចធ្លាយព័ត៌មានសម្ងាត់ អាចត្រូវបានប្រគល់ឲ្យកូរ៉េខាងជើង។ មានលទ្ធភាពដែលជនជាតិចិននេះ អាចជាអ្នកផ្តល់ព័ត៌មានសម្រាប់ការិយាល័យឈ្លបយកការណ៍ទូទៅរបស់កូរ៉េខាងជើង ដែលជាទីភ្នាក់ងារស៊ើបការណ៍សម្ងាត់របស់ប្រទេសនេះ។