អនុប្រធានាធិបតីអាមេរិក លោកស្រី Kamala Harris កំពុងធ្វើយុទ្ធនាការនៅរដ្ឋចចជៀ នៅថ្ងៃអង្គារ (ទី៣០ ខែកក្កដា) នេះ ដែលនេះជាការធ្វើដំណើរលើកដំបូងរបស់លោកស្រីទៅកាន់ទីនោះ ក្នុងនាមជាបេក្ខជនប្រជែងតំណែងប្រធានាធិបតី។

នៅទីនោះ លោកស្រី Harris នឹងធ្វើយុទ្ធនាការជួបជុំជាមួយតារាចម្រៀងរ៉េប គឺនាង Megan Thee Stallion នៅទីក្រុង Atlanta។ ដោយការបោះឆ្នោតឆ្នាំ២០២៤ រំកិលកាន់តែកៀកមែនទែនហើយនោះ ក្រុមរបស់គណបក្សប្រជាធិបតេយ្យ កំពុងផ្តោតលើបណ្ដារដ្ឋសមរភូមិ ឬរដ្ឋប្រទាញប្រទង់គ្នា ដូចជារដ្ឋចចជៀនេះជាដើម ដែលពួកគេបានទទួលជ័យជម្នះក្នុងសំឡេងដ៏ស្ដួចស្ដើងក្នុងឆ្នាំ២០២០ ដោយពួកគេសង្ឃឹមថា នឹងអាចកើតឡើងម្តងទៀត។

សមាជិកព្រឹទ្ធសភារដ្ឋចចជៀ លោក Jon Ossoff បាននិយាយតាមទូរទស្សន៍ MSNBC កាលពីចុងសប្តាហ៍ថា ការចូលប្រកួតប្រជែងរបស់លោកស្រី Harris «បានធ្វើឲ្យរដ្ឋចចជៀជាកន្លែងប្រជែងគ្នា» សម្រាប់គណបក្សប្រជាធិបតេយ្យ ហើយបានព្យាករថា លោកស្រីនឹងឈ្នះ។

គួរបញ្ជាក់ថា យុទ្ធនាការរបស់លោកស្រី Harris ទទួលបានសន្ទុះយ៉ាងខ្លាំងក្លា ដោយរៃអង្គាសប្រាក់បាន ២០០លានដុល្លារ និងទាក់ទាញអ្នកស្ម័គ្រចិត្តថ្មីបានចំនួន ១៧០,០០០នាក់ គិតចាប់តាំងពីលោកប្រធានាធិបតី Joe Biden គាំទ្រលោកស្រី បន្ទាប់ពីលោកបញ្ចប់ការប៉ុនប៉ងជាប់ឆ្នោតឡើងវិញរបស់លោក។

ការស្ទង់មតិថ្នាក់ជាតិរបស់សារព័ត៌មាន New York Times / Siena College ដែលបានចេញផ្សាយ កាលពីថ្ងៃទី២៥ ខែកក្កដា បានបង្ហាញថា លោកស្រី Harris បានកាត់បន្ថយការនាំមុខរបស់លោក Donald Trump យ៉ាងច្រើន ហើយបេក្ខជនរបស់គណបក្សសាធារណរដ្ឋ បាននាំមុខ ២ភាគរយ នៅក្នុងការស្ទង់មតិរបស់សារព័ត៌មាន Wall Street Journal ដែលត្រូវបានចេញផ្សាយ កាលពីថ្ងៃទី២៦ ខែកក្កដា។ ការស្ទង់មតិរបស់សារព័ត៌មាន Reuters/Ipsos ដែលបានចេញផ្សាយនៅថ្ងៃទី២៣ ខែកក្កដា បានបង្ហាញពីការនាំមុខរបស់លោកស្រី Harris លើគូបដិបក្ខ ២ពិន្ទុ។

ជាមួយគ្នានេះ យុទ្ធនាការរបស់លោកស្រី Harris ក៏កំពុងពិចារណាផងដែរ ក្នុងការជ្រើសរើសបេក្ខជនអនុប្រធានាធិបតី នាពេលខាងមុខ និងប្រើប្រាស់សាវតារបស់លោកស្រី ដើម្បីយកទៅប្រៀបធៀបបញ្ហាផ្លូវច្បាប់របស់លោក Trump៕