ស៊ីហ្គេម៖ មជ្ឈមណ្ឌលសន្និបាត និងពិព័រណ៍អន្តរជាតិជ្រោយចង្វារត្រូវបានវាយតម្លៃមានលក្ខណៈស្ដង់ដារ អាចរៀបចំការប្រកួតកីឡាក្នុងសាលបានជាង ១០ប្រភេទក្នុងព្រឹត្តិការណ៍កីឡាស៊ីហ្គេមឆ្នាំ២០២៣ នៅកម្ពុជា។ នេះបើតាមការបញ្ជាក់របស់ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិ រៀបចំការប្រកួតកីឡាអាស៊ីអាគ្នេយ៍លើកទី៣២ ឆ្នាំ២០២៣ (CAMSOC) ក្រោយដឹកនាំមន្ដ្រីជំនាញចុះពិនិត្យកាលពីថ្ងៃពុធកន្លងទៅ។
ឯកឧត្តម វ៉ាត់ ចំរើន បានគូសបញ្ជាក់ថា ការចុះត្រួតពិនិត្យនេះមានការចូលរួមពីគណៈកម្មការជំនាញ CAMSOC ដូចជាគណៈកម្មការទីលាន គណៈកម្មការបទប្បញ្ញត្តិ និងសហព័ន្ធកីឡាជាតិជាដើម ដើម្បីរៀបចំទីលានកីឡាក្នុងសាលឲ្យចេញជាផែនការច្បាស់លាស់ សម្រាប់ត្រៀមទទួលធ្វើម្ចាស់ផ្ទះការប្រកួតកីឡាស៊ីហ្គេម និងអាស៊ានប៉ារ៉ាហ្គេមឆ្នាំ២០២៣ តាមការចង្អុលបង្ហាញរបស់ឯកឧត្តមបណ្ឌិត ថោង ខុន ដែលបានណែនាំ និងជំរុញឲ្យគ្រប់គណៈកម្មការជំនាញ ត្រូវរៀបចំសកម្មភាពការងារទាំងអស់ឲ្យបានរួចរាល់នៅក្នុងឆមាសទី២ ស្របតាមអនុសាសន៍សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធាន CAMSOC។
បន្ទាប់ពីចុះត្រួតពិនិត្យរួចរាល់ គណៈកម្មការជំនាញ CAMSOC បានវាយតម្លៃជារួមថា មជ្ឈមណ្ឌលសន្និបាត និងពិព័រណ៍អន្តរជាតិជ្រោយចង្វារ មានលក្ខណៈស្ដង់ដារបច្ចេកទេសខ្ពស់ល្អ មានហេដ្ឋារចនាសម្ព័ន្ធទាំងក្នុង និងក្រៅធំទូលាយ ដែលសមស្របក្នុងការរៀបចំការប្រកួតប្រភេទកីឡាក្នុងសាល យ៉ាងហោចបានជាង ១០ប្រភេទពិសេសកីឡាប្រយុទ្ធ ដោយគ្រាន់តែរៀបចំតុបតែង និងបំពាក់សម្ភារៈប្រកួតទៅតាមប្រភេទកីឡានីមួយៗ ហើយទីតាំងនេះក៏មានលក្ខណៈស្ដង់ដារស័ក្តិសម នឹងកិត្តិយសរបស់ម្ចាស់ផ្ទះផងដែរ។
សូមបញ្ជាក់ថា មជ្ឈមណ្ឌលសន្និបាត និងពិព័រណ៍អន្តរជាតិជ្រោយចង្វារ គឺជាទីតាំងមួយនៃរាជធានីភ្នំពេញដែលត្រូវបាន CAMSOC សម្រេចជាបឋមក្នុងការជ្រើសរើសជាកន្លែងរៀបចំការប្រកួតកីឡាស៊ីហ្គេម និងអាស៊ានប៉ារ៉ាហ្គេមឆ្នាំ២០២៣ ក្នុងចំណោមទីតាំងនៃទីលានប្រកួតធំៗចំនួន ៥ ដែលបានកំណត់កាលពីថ្មីៗ រួមមានរាជធានីភ្នំពេញ ខេត្តសៀមរាប ខេត្តព្រះសីហនុ ខេត្តកំពត និងខេត្ដកែប។ ប៉ុន្ដែរាជធានីភ្នំពេញគឺជាកន្លែងប្រមូលផ្ដុំប្រកួតកីឡាជាច្រើន ពិសេសនៅពហុកីឡដ្ឋានជាតិមរតកតេជោ និងពហុកីឡដ្ឋានជាតិអូឡាំពិកជាដើម៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
