យ៉ាងហោចណាស់មានកុមារជនជាតិដើមអាមេរិក ចំនួន ៩៧៣នាក់ បានស្លាប់នៅសាលាអាហាររូបករណ៍ឥណ្ឌា (Indian Boarding Schools) ចាប់ពីឆ្នាំ១៨១៩ ដល់ឆ្នាំ១៩៦៩ នេះបើយោងតាមរបាយការណ៍សហព័ន្ធ ដែលអំពាវនាវឱ្យរដ្ឋាភិបាលអាមេរិក សូមអភ័យទោសចំពោះគោលនយោបាយបង្រួបបង្រួមដោយបង្ខំរយៈពេល ១៥០ឆ្នាំ ដែលប្រើដើម្បីបំបែកកុមារចេញពីគ្រួសារ និងបំផ្លាញអត្តសញ្ញាណកុលសម្ព័ន្ធ។

កុមារជាច្រើននាក់ដែលបានស្លាប់ត្រូវបានបញ្ចុះនៅអតីតសាលាចំនួន ៦៥កន្លែងនៅទូទាំងប្រទេស នៅក្នុងកន្លែងបញ្ចុះសពយ៉ាងហោចណាស់ចំនួន ៧៤ទីតាំងដែលត្រូវបានសម្គាល់ និងមិនត្រូវបានសម្គាល់ នេះបើយោងតាមការសិក្សារបស់ក្រសួងមហាផ្ទៃអាមេរិក ចេញផ្សាយកាលពីថ្ងៃអង្គារ (៣០ កក្កដា)។

មន្ត្រីនៅក្រសួងមហាផ្ទៃទទួលបន្ទុកកិច្ចការឥណ្ឌា លោក ប្រាយអ៊ិន ញូវលែន (Bryan Newland) នៃសហគមន៍ឥណ្ឌា (Ojibwe) បានសរសេរលើទំព័រមុខនៃរបាយការណ៍នោះថា «គោលនយោបាយសហព័ន្ធត្រូវបានកំណត់ដើម្បីបំបែកក្រុមគ្រួសារ ក្រសោបយកទឹកដី ព្រមទាំងបំផ្លាញវប្បធម៌ និងជីវិតរបស់យើង»។

សូមបញ្ជាក់ថា ឃ្លាជនជាតិដើមអាមេរិក ត្រូវបានគេប្រើញឹកញាប់បំផុតសម្រាប់មនុស្សដែលបុព្វបុរសរបស់ពួកគេរស់នៅក្នុងអាមេរិកខាងជើង និងខាងត្បូង មុនពេលការមកដល់នៃជនជាតិអឺរ៉ុបក្នុងឆ្នាំ១៤៩២។ របាយការណ៍នេះលើកឡើងពីមធ្យោបាយដែលសហរដ្ឋអាមេរិក អាចធ្វើវិសោធនកម្មចំពោះការរំលោភបំពានផ្លូវកាយ និងផ្លូវភេទរបស់កុមារដែលត្រូវបានចោទប្រកាន់ នៅពេលពួកគេត្រូវបានដកហូតឈ្មោះ និងហាមឃាត់មិនឱ្យនិយាយភាសាកំណើតរបស់ពួកគេក្នុងសាលារៀនទាំងនោះ៕