បេក្ខជនមកពីគណបក្សសាធារណរដ្ឋ លោក Donald Trump បានវាយប្រហារអនុប្រធានាធិបតីអាមេរិក លោកស្រី Kamala Harris និងស្វាមីជនជាតិជ្វីហ្វរបស់លោកស្រី គឺលោក Doug Emhoff ដោយបានប្រើវោហារសាស្ត្រប្រឆាំងនឹងជនជាតិជ្វីហ្វ ពោលគឺជាពាក្យពេចន៍ ដែលជនជាតិជីហ្វអាមេរិកតែងបង្ហាញភាពស្មោះត្រង់ឲ្យគ្នាទៅវិញទៅមកជាមួយអ៊ីស្រាអែល។

នៅក្នុងបទសម្ភាសន៍ កាលពីថ្ងៃអង្គារ (ទី៣០ ខែកក្កដា) ជាមួយវិទ្យុ WABC នៅទីក្រុងញូវយ៉ក លោក Trump បាននិយាយថា លោកស្រី Harris ហាក់ដូចជាមានការរំខានក្នុងចិត្ត ក្នុងអំឡុងពេលកិច្ចប្រជុំ កាលពីសប្តាហ៍មុន ជាមួយនាយករដ្ឋមន្ត្រីអ៊ីស្រាអែល លោក Benjamin Netanyahu។ ការអត្ថាធិប្បាយនេះ គឺជាការប៉ុនប៉ងចុងក្រោយបង្អស់របស់លោក Trump ក្នុងការជំរុញឲ្យមានការឃ្នើសចិត្តជាមួយគ្នា រវាងអ្នកបោះឆ្នោតជនជាតិជ្វីហ្វ និងគណបក្សប្រជាធិបតេយ្យ ជុំវិញសង្រ្គាមអ៊ីស្រាអែល និងក្រុមហាម៉ាស។

លោក Trump បានលើកឡើងថា៖ «អ្នកអាចមើលឃើញការប្រមាថមើលងាយនោះ។ ទី១ លោកស្រីមិនចូលចិត្តអ៊ីស្រាអែលទេ។ ហើយទី២ លោកស្រីក៏មិនចូលចិត្តជនជាតិជីហ្វនោះដែរ។ អ្នកដឹងពីរឿងនេះ ខ្ញុំដឹងពីរឿងនេះ ហើយអ្នករាល់គ្នាក៏ដឹងពីរឿងនេះ គ្រាន់តែគ្មាននរណាម្នាក់ចង់និយាយពីវាតែប៉ុណ្ណោះ»។

គួរបញ្ជាក់ថា សមាជិករបស់គណបក្សប្រជាធិបតេយ្យខ្លះ បានជំរុញឲ្យរដ្ឋបាលរបស់លោក Joe Biden កាត់ផ្តាច់ជំនួយយោធាដល់អ៊ីស្រាអែល ពាក់ព័ន្ធនឹងចំនួនជនស៊ីវិល ស្លាប់នៅតំបន់ហ្កាហ្សា។ ចំណែកលោកស្រី Harris បាននិយាយថា លោកស្រីនឹងនិយាយអំពីការឈឺចាប់របស់ប៉ាឡេស្ទីន ខណៈពេលដែលគាំទ្រសិទ្ធិការពារខ្លួនរបស់អ៊ីស្រាអែល។ 

ការវាយប្រហារនេះមានសក្តានុពលក្នុងការពង្រឹងអ្នកប្រជាធិបតេយ្យជនជាតិជ្វីហ្វ និងនាំឲ្យមានការយកចិត្តទុកដាក់ ចំពោះភាសាបញ្ឆេះកាលអតីតកាលរបស់លោក Trump ហើយនិងសកម្មភាពនានា លើបញ្ហាជាតិសាសន៍។ 

ក្រោយមកនៅក្នុងបទសម្ភាសន៍នោះ ពិធីករ លោក Sid Rosenberg បានលើកឡើងលោក Emhoff ដោយនិយាយថា៖ «គាត់ជាជនជាតិជ្វីហ្វ ដូចសមាជិកព្រឹទ្ធសភាលោក Bernie Sanders ដែរ។ តើអ្នកលេងសើចជាមួយខ្ញុំឬ? លោក Trump បានឆ្លើយតបថា «មែនហើយ»។ លោក Rosenberg បានបន្តថា៖ «គាត់ជាជនជាតិជីហ្វដ៏អាក្រក់»។ លោក Trump បាននិយាយថា «មែនហើយ»៕