មន្ត្រីពន្លត់អគ្គិភ័យ នៅរដ្ឋ California បាននិយាយថា ចំហេះព្រៃដ៏ធំបំផុត នៅសហរដ្ឋអាមេរិក បានរាលដាលដល់ផ្ទៃដីជាង ១.៥៥៣គីឡូម៉ែត្រក្រឡា កាលពីថ្ងៃអង្គារ (ទី៣០ ខែកក្កដា) ពោលគឺមានទំហំធំជាងទីក្រុង Los Angeles ខណៈដែលអ្នកពន្លត់អគ្គិភ័យរាប់ពាន់នាក់ បានប្រឹងប្រែងប្រយុទ្ធនឹងអណ្ដាតភ្លើង នៅតំបន់វាលរហោស្ថានភាគខាងជើងនៃទីក្រុង Sacramento។

អ្នកពន្លត់អគ្គិភ័យជាង ៥.៥០០នាក់ មកពីទូទាំងរដ្ឋ California និងរដ្ឋផ្សេងទៀត កំពុងធ្វើការឥតសម្រាកដើម្បីពន្លត់អគ្គិភ័យ Park Fire ដែលឆាបឆេះនៅតំបន់ជ្រលងភ្នំភាគកណ្តាលរបស់រដ្ឋ ចម្ងាយប្រហែល ១៤៥គីឡូម៉ែត្រភាគខាងជើងនៃទីក្រុង Sacramento។ ក្រុមមន្ត្រីបានប្រាប់ថា អណ្ដាតភ្លើងបានឆេះរាលដាលដល់ផ្ទៃដី ១៥៥.៨៣០ហិចតា ដែលបានធ្វើឲ្យវាក្លាយជាចំហេះព្រៃដ៏ធំបំផុតទី៥ នៅក្នុងប្រវត្តិសាស្ត្ររដ្ឋ California។

មន្ត្រីពន្លត់អគ្គិភ័យបានបន្តថា ចំហេះ Park Fire កាលពីថ្ងៃទី៣០ ខែកក្កដា បានមានទំហំលើសអគ្គិភ័យ Creek Fire ឆ្នាំ២០២០ នៅក្នុងតំបន់ Fresno County ដែលកាលនោះ បានឆេះផ្ទៃដីស្ទើរតែ ១៥៣.៧៨០ហិកតា។ ប៉ុន្តែយ៉ាងណាក្ដី អគ្គិភ័យនេះនៅតែមានទំហំតូចជាងចំហេះដ៏ធំបំផុត ក្នុងកំណត់ត្រារបស់រដ្ឋ គឺអគ្គិភ័យ August Complex ឆ្នាំ២០២០ ដែលបានឆាបឆេះផ្ទៃដីជាងមួយលានហិចតា នៅក្នុងតំបន់ចំនួន ៧ នៅភាគខាងជើងរដ្ឋ California។

ជាមួយគ្នានេះ មន្ត្រីពន្លត់អគ្គិភ័យ បានបន្ថែមទៀតថា ចំហេះ Park Fire ដែលមានសកម្មភាពត្រឹមតែ ១៤ភាគរយប៉ុណ្ណោះ កាលពីថ្ងៃទី៣០ ខែកក្កដា បានបង្ខំឲ្យមានការជម្លៀសមនុស្សជាង ៤.០០០នាក់ ហើយបានបំផ្លាញ ឬបង្កការខូចខាតដល់រចនាសម្ព័ន្ធផ្សេងជាង ១៩២។ តែយ៉ាងណាក្ដី គ្មានអ្នករបួស ឬស្លាប់ត្រូវបានគេរាយការណ៍នៅឡើយទេ៕