អ្នកនាំពាក្យគណៈរដ្ឋមន្ត្រីប្រទេសប៉ាណាម៉ា កាលពីថ្ងៃអង្គារ (ទី៣០ ខែកក្កដា) បានប្រាប់ឲ្យដឹងថា អាជ្ញាធរអាកាសចរណ៍ស៊ីវិលរបស់ប្រទេស ត្រូវបានបញ្ជាឲ្យអនុវត្ត «វិធានការសងសឹក» ប្រឆាំងនឹងប្រទេសវេណេស៊ុយអេឡា ចាប់ពីល្ងាចថ្ងៃពុធ (ទី៣១ ខែកក្កដា) នេះ ដោយមិនបានផ្តល់ព័ត៌មានលម្អិតបន្ថែមអ្វីឡើយ។

គួរបញ្ជាក់ថា ប្រធានាធិបតីវេណេស៊ុយអេឡា លោក Nicolas Maduro បានប្រកាសថា លោកបានឈ្នះអាណត្តិទី៣ ភ្លាមៗ បន្ទាប់ពីពាក់កណ្តាលអធ្រាត្រថ្ងៃចន្ទ ប៉ុន្តែក្រុមប្រឆាំង អ្នកស្ទង់មតិឯករាជ្យ និងមេដឹកនាំអន្តរជាតិជាច្រើន បានចាត់ទុកលទ្ធផលនេះថា មិនអាចទុកចិត្តបាន។

ចាប់តាំងពីពេលនោះមក ប្រទេសប៉ាណាម៉ា បានផ្អាកទំនាក់ទំនងការទូតរបស់ខ្លួន ជាមួយវេណេស៊ុយអេឡា ហើយបានប្រកាសថា ខ្លួននឹងដកបុគ្គលិកការទូតរបស់ខ្លួន រហូតទាល់តែការពិនិត្យពេញលេញទាំងស្រុងនូវលទ្ធផលនៃការបោះឆ្នោតដ៏ចម្រូងចម្រាសនេះ ត្រូវបានធ្វើឡើង។

បទបញ្ជានេះ ធ្វើឡើងបន្ទាប់ពីមានឧប្បត្តិហេតុមួយ ដោយយន្តហោះចាកចេញពីប្រទេសប៉ាណាម៉ា ដែលដឹកអតីតប្រធានាធិបតីក្នុងតំបន់ ធ្វើដំណើរទៅចូលរួមសង្កេតការណ៍ការបោះឆ្នោត កាលពីថ្ងៃអាទិត្យ នៅវេណេស៊ុយអេឡា ត្រូវបានរារាំង។

អាជ្ញាធរប៉ាណាម៉ា និងវេណេស៊ុយអេឡា កាលពីព្រឹកថ្ងៃអង្គារ បាននិយាយថា ជើងហោះហើរ នឹងត្រូវផ្អាក។ ជាមួយគ្នានេះ វេណេស៊ុយអេឡា ក៏បានផ្អាកជើងហោះហើរទៅកាន់សាធារណរដ្ឋដូមីនីក ដោយនិយាយថា រដ្ឋាភិបាលទាំង២ កំពុងជ្រៀតជ្រែកក្នុងកិច្ចការជាតិរបស់ខ្លួន។

ប្រធានាធិបតីប៉ាណាម៉ា លោក Jose Raul Mulino និងសមភាគីដូមីនីក លោក Luis Abinader បានអំពាវនាវឲ្យពិនិត្យឡើងវិញនូវលទ្ធផលនៃបោះឆ្នោតនោះ៕