​អាមេរិក៖ អាកាសធាតុ​ល្អ​កាលពី​ថ្ងៃ​ព្រហស្បតិ៍​ បាន​ជួយ​ប្រយុទ្ធ​ប្រឆាំង​នឹង​ភ្លើង​ឆេះ​ព្រៃ​ដ៏​ធំ​នៅ​រដ្ឋ ​California ដែល​គំរាមកំហែង​ដល់​សហគមន៍​នៅ​ជុំវិញ​បឹង Tahoe ប៉ុន្តែ​ក្រុម​មេបញ្ជាការ​ពន្លត់​អគ្គិភ័យ​បាន​ព្រមាន​ក្រុម​អ្នក​ពន្លត់​អគ្គិភ័យឱ្យ​ត្រៀមខ្លួន​ សម្រាប់​គ្រោះថ្នាក់​ដែល​កំពុង​កើតឡើង​។

​ខ្យល់​បក់​ខ្លាំង និង​ស្ថានភាព​ស្ងួត​ហែង​ដែល​បណ្តាល​ឱ្យ​ភ្លើង​ឆេះ​ព្រៃ​មាន​ឈ្មោះថា Caldor Fire ឆេះ​រាលដាល​ខ្លាំង​ទៅដល់​តំបន់ Sierra Nevada រយៈពេល​ជាច្រើន​ថ្ងៃ ប៉ះពាល់​ទីក្រុង​ធំ​បំផុត​ដែល​ជា​តំបន់​កម្សាន្ត​ដ៏​សំខាន់​ស្ថិតនៅ​ព្រំដែន​រដ្ឋ​ California​-​Nevada។ មនុស្ស​រាប់​ពាន់​នាក់​ត្រូវ​បង្ខំចិត្ត​ភៀសខ្លួន​ចេញពី​តំបន់​បឹង South Tahoe កាលពីដើម​សប្ដាហ៍​នេះ​។​ ​មន្ត្រី​បាន​ព្រមាន​ថា ​ប៉ុន្តែ​ខ្យល់​កន្ត្រាក់​ខ្លាំង​ទំនងជា​នៅ​តំបន់​ខ្លះ ​ហើយ​ព្រៃ​នៅតែ​ស្ងួត​ខ្លាំង​។ ភ្លើង​កំពុង​ឆាបឆេះ​ផ្នែក​ខាងមុខ​ជាច្រើន​កន្លែង ដែល​កំពុង​គំរាមកំហែង​ដល់​សហគមន៍​ជាច្រើន​។​ ​ភ្លើង​បាន​ឆាបឆេះ​លើ​ផ្ទៃដី​ជាង ៨៥០​គីឡូម៉ែត្រ​ក្រឡា និង​ទើប​ពន្លត់​បាន ២៥% ​កាលពី​ថ្ងៃ​ព្រហស្បតិ៍​។​

​អ្នក​ពន្លត់​អគ្គិភ័យ​ជាង ១៥.០០០​នាក់​កំពុង​ប្រយុទ្ធ​ប្រឆាំង​នឹង​ភ្លើង​ឆេះ​នៅ​រដ្ឋ​ California ​រាប់​សិបកន្លែង រួម​ទាំង​ការ​ឆាប​ឆេះ​ដ៏​គួរ​ឱ្យ​ភ័យខ្លាច​មួយទៀត​ គឺភ្លើង​ឆេះ​ព្រៃ​ដែល​មាន​ឈ្មោះថា Dixie Fire ចម្ងាយ​ប្រហែល ១០៥​គីឡូម៉ែត្រ​ភាគ​ខាងជើង​។ វា​គឺជា​ភ្លើង​ឆេះ​ព្រៃ​ដ៏​ធំ​បំផុត​ទី២ នៅ​ក្នុង​ប្រវត្តិសាស្ត្រ​របស់​រដ្ឋ​នេះ ​ដែល​បាន​ឆេះ​បំផ្លាញ​ព្រៃឈើ​ប្រហែល ៣.៤៨០​គីឡូម៉ែត្រ​ក្រឡា​៕

អត្ថបទ៖ សុខមាន