ប្រធានាធិបតីម៉ិកស៊ិក លោក Andres Manuel Lopez Obrador កាលពីថ្ងៃអង្គារ បានអំពាវនាវឱ្យសហគមន៍អន្តរជាតិ បញ្ចៀសការប្រកាន់យកជំហរអន្ដរាគមន៍ ទាក់ទងទៅនឹងការបោះឆ្នោតប្រធានាធិបតី នៅក្នុងប្រទេសវេណេស៊ុយអេឡា។ 

នៅក្នុងសន្និសីទសារព័ត៌មានប្រចាំថ្ងៃ លោក Lopez Obrador បានស្នើឱ្យរង់ចាំលទ្ធផលចុងក្រោយនៃការបោះឆ្នោត ដែលត្រូវបានរៀបចំឡើងកាលពីថ្ងៃអាទិត្យ នៅក្នុងប្រទេសអាមេរិកខាងត្បូងមួយនេះ។

លោកប្រធានាធិបតី បាននិយាយទៅកាន់អ្នកសារព័ត៌មាននៅវិមានជាតិក្នុងទីក្រុង Mexico City ថា « បញ្ហានោះគឺថាត្រូវរង់ចាំលទ្ធផល និងការគោរពការប្តេជ្ញាចិត្តផ្ទាល់ខ្លួនរបស់ប្រជាជនផងដែរ។ 

លោក បានសួរថា តើរដ្ឋាភិបាលនៃប្រទេសដទៃ ពុំមានកិច្ចការត្រូវធ្វើទេឬ? ហេតុអ្វី បានជាពួកគេត្រូវចូលពាក់ព័ន្ធក្នុងកិច្ចការរបស់ប្រទេសដទៃ? ហេតុអ្វី បានជាត្រូវមកជ្រៀតជ្រែក?។

លោក Lopez Obrador ក៏បានចោទសួរពីតួនាទីរបស់អង្គការរដ្ឋទ្វីបអាមេរិក ដោយជំរុញឱ្យអង្គការនេះ បញ្ឈប់ការចូលរួមក្នុងការ«ធ្វើសកម្មភាពនយោបាយ»។ 

លោកប្រធានាធិបតីបានព្រមានថា ក្នុងនាមជាប្រទេសកាន់លទ្ធិប្រជាធិបតេយ្យ «នេះជាការប្រព្រឹត្តអំពើឃោរឃៅ» ដោយនិយាយសំដៅទៅលើរដ្ឋាភិបាលដែលចង់ចូលរួមក្នុងភាគីនៅវ៉េណេស៊ុយអេឡា។