ប្រធានគោលនយោបាយការបរទេសរបស់សហភាពអឺរ៉ុប (EU) លោក Josep Borrell នៅថ្ងៃពុធ (ទី៣១ ខែកក្កដា) បាននិយាយថា ប្លុកមិនអាចទទួលស្គាល់លទ្ធផលបោះឆ្នោតរបស់វេណេស៊ុយអេឡាបានទេ រហូតទាល់តែសន្លឹកឆ្នោតទាំងអស់ត្រូវបានរាប់ ហើយការកត់ត្រាត្រូវបានផ្ដល់ឲ្យ ខណៈមានការព្រួយបារម្ភជាអន្តរជាតិ អំពីភាពត្រឹមត្រូវនៃការបោះឆ្នោតនេះ។

គួរបញ្ជាក់ថា អាជ្ញាធររៀបចំការបោះឆ្នោតរបស់វេណេស៊ុយអេឡា បានប្រាប់ឲ្យដឹងថា ប្រធានាធិបតី លោក Nicolas Maduro បានឈ្នះតំណែងអាណត្តិទី៣ ក្នុងការបោះឆ្នោត កាលពីថ្ងៃអាទិត្យចុងសប្ដាហ៍កន្លងមក ដោយទទួលបានសំឡេងឆ្នោត ៥១ភាគរយ ពោលគឺជាលទ្ធផលជួយបន្តអំណាចសង្គមនិយមរយៈពេល ២៥ឆ្នាំ បើទោះបីជាមានការស្ទង់មតិអ្នកចេញពីកន្លែងបោះឆ្នោតបង្ហាញពីជ័យជម្នះរបស់គណបក្សប្រឆាំងក៏ដោយ។

លោក Borrell បាននិយាយថា គណៈកម្មការរៀបចំការបោះឆ្នោត បានប្រកាសលទ្ធផលបោះឆ្នោតដោយឈរលើមូលដ្ឋាននៃការរាប់សន្លឹកឆ្នោត ៨០ភាគរយ ខណៈដែលគណបក្សប្រឆាំងវេណេស៊ុយអេឡា បានបញ្ចេញលទ្ធផលខុសគ្នាឆ្ងាយ។

អំឡុងដំណើរទស្សនកិច្ចនៅប្រទេសវៀតណាម លោកបានប្រាប់អ្នកសារព័ត៌មានថា៖ «នោះគឺជាហេតុផលបន្ថែមទៀត ក្នុងការមិនទទួលស្គាល់លទ្ធផល រហូតទាល់តែសន្លឹកឆ្នោតទាំងអស់ នឹងត្រូវបានផ្ទៀងផ្ទាត់ទាំងស្រុង និងដោយឯករាជ្យ»។

លោក Borrell បានបន្ថែមថា សមាជិកនៃប្លុកដែលមានសមាជិក ២៧ប្រទេសនេះ នឹងសម្រេចលើជំហានបន្ទាប់ដែលអាចធ្វើទៅបាន លុះត្រាតែមានលទ្ធផលពេញលេញទាំងស្រុង៕