ប្រព័ន្ធផ្សព្វផ្សាយរដ្ឋ នៅថ្ងៃពុធ (ទី៣១ ខែកក្កដា) បានរាយការណ៍ថា លោក Wang Yilin ដែលជាអតីតប្រធាន និងជាលេខាគណបក្សកុម្មុយនីស្តនៃក្រុមហ៊ុនរដ្ឋចិន National Petroleum Corp (CNPC) ត្រូវបានបក្សកាន់អំណាចរបស់ប្រទេសចិនមួយនេះសម្រេចដកចេញពីបក្សហើយ ដោយសារបំពានវិន័យ។

យោងតាមសេចក្ដីរាយការណ៍របស់ទូរទស្សន៍ CCTV ដែលគ្រប់គ្រងដោយរដ្ឋ បានឲ្យដឹងថា លោក Wang បានទទួលយកទ្រព្យសម្បត្តិ និងវត្ថុដែលមានតម្លៃខ្ពស់ ដោយខុសច្បាប់ ហើយបានឆ្លៀតឱកាសប្រើប្រាស់មុខតំណែងរបស់ខ្លួន ដើម្បីជួយឲ្យអ្នកដទៃផ្សេងទៀតស្វែងរកផលប្រយោជន៍ នៅក្នុងកិច្ចសន្យាគម្រោង និងប្រតិបត្តិការអាជីវកម្ម។

ជាមួយគ្នានេះ សេចក្ដីរាយការណ៍ បានឲ្យដឹងទៀតថា លោកក៏បានទទួលយកផងដែរនូវការធ្វើដំណើរដែលរៀបចំដោយសហគ្រិនឯកជន ក្នុងពិធីជាច្រើន។ ប្រព័ន្ធផ្សព្វផ្សាយរដ្ឋបាននិយាយថា ករណីរបស់លោក Wang នឹងត្រូវផ្ទេរទៅឲ្យរដ្ឋអាជ្ញា ស៊ើបអង្កេតតាមច្បាប់។

សារព័ត៌មាន Reuters មិនអាចទាក់ទងលោក Wang បានភ្លាមៗនោះឡើយ ដើម្បីសុំការអត្ថាធិប្បាយ។ ដូចគ្នាដែរ ក្រុមហ៊ុន CNPC ក៏មិនបានឆ្លើយតបភ្លាមៗនោះដែរ ចំពោះសំណើសុំការអត្ថាធិប្បាយ ពាក់ព័ន្ធនឹងករណីនេះ។

បើយោងតាមគេហទំព័រសារព័ត៌មានរដ្ឋ The Paper បានឲ្យដឹងថា លោក Wang បានលាឈប់ពីតួនាទី នៅក្រុមហ៊ុន CNPC ក្នុងខែមករា ឆ្នាំ២០២០ ដោយដល់អាយុចូលនិវត្តន៍។ តែយ៉ាងណាក្ដី បើយោងតាមសេចក្ដីរាយការណ៍នោះ បានបន្ថែមថា លោកបានបន្តតួនាទីជាអនុប្រធានគណៈកម្មាធិការសេដ្ឋកិច្ចនៃសន្និសីទប្រឹក្សានយោបាយប្រជាជនចិន (CPPCC) ដែលជាស្ថាប័នប្រឹក្សាកំពូលរបស់បក្សកុម្មុយនីស្ត៕