គណៈរដ្ឋមន្រ្តីលីបង់ មាននូវជំនួបបន្ទាន់មួយនៅព្រឹកថ្ងៃពុធនេះ ដើម្បីពិភាក្សាលើការវាយប្រហារលើទីក្រុង Beirut និងបានចេញសេចក្តីថ្លែងការណ៍មួយ អានដោយរដ្ឋមន្រ្តីក្រសួងព័ត៌មានលោក Ziad Makary ។

លោក Makary បានថ្កោលទោសការវាយប្រហារនេះ និងបាននិយាយថា ការសងសឹករបស់ក្រុមហេសប៊ូឡា ត្រូវបានគេរំពឹងទុក ប៉ុន្តែរដ្ឋាភិបាលលីបង់ មានការព្រួយបារម្ភថា ស្ថានភាពអាចនឹងឡើងកម្តៅជាងនេះ ។

លោកនិយាយថា លីបង់ ពុំចង់បានសង្រ្គាមនោះទេ ហើយរដ្ឋាភិបាលរបស់លោក នឹងចូលរួមកិច្ចខិតខំផ្នែកការទូត ដើម្បីធ្វើឲ្យភាពតានតឹងស្ងប់ស្ងាត់ទៅវិញ ។

ក្រុមហេសប៊ូឡា និយាយនៅព្រឹកថ្ងៃពុធនេះថា មេបញ្ជាការជាន់ខ្ពស់របស់ខ្លួនលោក Fuad Shukr បានស្ថិតនៅក្នុងអគារតំបន់ជាយក្រុងភាគខាងត្បូងទីក្រុង Beirut ពេលរងការវាយប្រហាររបស់អ៊ីស្រាអែល ប៉ុន្តែក្រុមមួយនេះ ពុំបានបញ្ជាក់ពីជោគវាសនារបស់គាត់នោះទេ ។

ដោយឡែក យោធាអ៊ីស្រាអែល បានប្រកាសកាលពីយប់ថ្ងៃអង្គារថា ពួកគេបានសម្លាប់លោក Shukr ដែលជាមេបញ្ជាការជាន់ខ្ពស់ជាងគេបំផុតរបស់ក្រុមហេសប៊ូឡា និងជាអ្នកដែលពួកគេដាក់ការស្តីបន្ទោស សម្រាប់ការវាយប្រហារកាលពីចុងសប្តាហ៍កន្លងទៅ សម្លាប់យុវជនរាប់សិបនាក់ នៅតំបន់ខ្ពស់រាប Golan Heights កាន់កាប់ដោយអ៊ីស្រាអែល ៕