នៅថ្ងៃពុធនេះ រដ្ឋមន្រ្តីការបរទេសសហរដ្ឋអាមេរិកលោក Antony Blinken បាននិយាយថា គ្មានអ្វីសំខាន់ជាងការទទួលបានបទឈប់បាញ់នៅក្នុងតំបន់ហ្កាហ្សានោះទេ ក្រោយមេដឹកនាំក្រុមជីវពលហាម៉ាស់លោក Ismail Haniyeh ត្រូវបានគេធ្វើឃាតនៅព្រឹកថ្ងៃនេះ ក្នុងប្រទេសអ៊ីរ៉ង់ ។

នៅពេលសួរថាតើ ការស្លាប់របស់លោក Haniyeh នឹងប៉ះពាល់បែបណាខ្លះ ដល់ភាពតានតឹងនៅតំបន់មជ្ឈិមបូព៌ានោះ លោក Blinken ដែលស្ថិតក្នុងដំណើរទស្សនកិច្ចផ្លូវរដ្ឋទៅកាន់ប្រទេសសិង្ហបុរី ជាផ្នែកមួយនៃដំណើរទស្សនកិច្ច ៦ប្រទេសរបស់លោកនៅតំបន់អាស៊ី បានឆ្លើយថា លោកនឹងមិនព្យាករណ៍លើផលប៉ះពាល់អ្វីនោះទេ សូម្បីមួយហេតុការណ៍មួយ អាចមានលើបទឈប់បាញ់ ។

លោក Haniyeh គឺជាប្រធានគោលនយោបាយនិរទេសខ្លួនរបស់ក្រុមសកម្មប្រយុទ្ធហាម៉ាស់ ហើយបានចំណាយពេលច្រើន ក្នុងប៉ុន្មានឆ្នាំចុងក្រោយនេះនៅក្នុងប្រទេសកាតា ។  

អំឡុងសង្គ្រាមអ៊ីស្រាអែល-ហ្កាហ្សា លោកបានដើរតួជាអ្នកចរចាក្នុងកិច្ចចរចាបទឈប់បាញ់ និងបានទាក់ទងជាមួយសម្ព័ន្ធមិត្តសំខាន់របស់ក្រុមហាម៉ាស គឺអ៊ីរ៉ង់ ។

 ការធ្វើឃាតនេះ បានកើតមានឡើង ស្របពេលដែលយុទ្ធនាការសឹករបស់អ៊ីស្រាអែលនៅតំបន់ហ្កាហ្សា ជិតឈានដល់ដំណាច់ខែទី ១០ ដោយគ្មានសញ្ញាណាមួយនៃការបញ្ចប់សង្រ្គាមដែលគំរាមកំហែងដល់ជម្លោះក្នុងតំបន់ទ្រង់ទ្រាយធំជាងនេះ ។

 ដោយឡែក កិច្ចព្រមព្រៀងដែលសម្របសម្រួលដោយអេហ្ស៊ីប និងកាតា ទំនងជាត្រូវជាប់គាំង ក្រោយការធ្វើឃាតនេះ ៕