ពលរដ្ឋលីបង់ភ្ញាក់ឡើងនៅព្រឹកថ្ងៃពុធនេះ ភ្ញាក់ផ្អើលនឹងព័ត៌មានជុំវិញការសម្លាប់មេដឹកនាំក្រុមហាម៉ាស់លោក Ismail Haniyeh ហើយនិងការវាយប្រហាររបស់អ៊ីស្រាអែលលើតំបន់ជាយក្រុងភាគខាងត្បូងទីក្រុង Beirut ។

លោក Tracy J គឺជាអ្នកសារព័ត៌មានមួយរូបរបស់លីបង់ និយាយថា តើពួកយើងរំពឹងថានឹងមានអ្វីផ្សេងទៀតឬ? ពួកយើងភ្ញាក់ឡើងឮព័ត៌មានថា លោក Ismail Haniyeh ត្រូវបានគេធ្វើឃាតនៅថ្ងៃនេះ ក្នុងប្រទេសអ៊ីរ៉ង់ ។ វាហាក់ដូចជាពួកយើងត្រូវបានគេប្រាប់ឥតឈប់ឈរពីរឿងហេតុកើតឡើងនៅសង្រ្គាមក្នុងតំបន់ ។

ក្រុមជីវពលប៉ាឡេស្ទីន និយាយថា មេដឹកនាំក្រុមហាម៉ាស់ ត្រូវបានគេធ្វើឃាតនៅព្រឹកមិញនេះ ក្នុងប្រទេសអ៊ីរ៉ង់ ធ្វើឲ្យកើតមានការព្រួយបារម្ភដល់ការឡើងកម្តៅភាពតានតឹងបន្ថែមទៀតនៅក្នុងតំបន់ ដែលរងភាពរង្គោះរង្គើរួចទៅហើយដោយសារសង្រ្គាមរបស់អ៊ីស្រាអែលនៅតំបន់ហ្កាហ្សា ហើយនិងជម្លោះកាន់តែធ្ងន់ធ្ងរនៅប្រទេសលីបង់ ។

ព័ត៌មាននេះ ដែលបានកើតឡើងរយៈពេលតិចជាង ២៤ម៉ោង ក្រោយអ៊ីស្រាអែលអះអាងថា បានសម្លាប់មេបញ្ជាការក្រុមហេសប៊ូឡាដែលពួកគេអះអាងថា នៅពីក្រោយការវាយប្រហារសម្លាប់មនុស្សក្នុងតំបន់ខ្ពស់រាប Golan Heights កាន់កាប់ដោយអ៊ីស្រាអែល ទំនងជាធ្វើឲ្យលែងមានឱកាសណាមួយនៃកិច្ចព្រមព្រៀងបទឈប់បាញ់នៅតំបន់ហ្កាហ្សា ។

ក្នុងពេលតែមួយនេះ ហានិភ័យនៃសង្រ្គាមរវាងអ៊ីស្រាអែល និងក្រុមហេសប៊ូឡា បានកើនឡើង បន្ទាប់ពីការវាយប្រហារតំបន់ខ្ពង់រាប Golan Heights សម្លាប់កុមារ ១២នាក់ នៅក្នុងភូមិ Druze កាលពីថ្ងៃសៅរ៍ និងការសម្លាប់មេបញ្ជាការជាន់ខ្ពស់បំផុតរបស់ក្រុមហេសប៊ូឡាគឺលោក Fuad Shukr ៕