អភិបាលក្រុង Nagasaki នៅថ្ងៃពុធ (ទី៣១ ខែកក្កដា) នេះ បានប្រាប់ឲ្យដឹងថា ឯកអគ្គរដ្ឋទូតអ៊ីស្រាអែលប្រចាំនៅប្រទេសជប៉ុន នឹងមិនត្រូវបានអញ្ជើញឲ្យចូលរួមក្នុងពិធីសន្តិភាពប្រចាំឆ្នាំរបស់ទីក្រុងនេះនោះទេ ដោយបន្ថែមថា ការសម្រេចនេះត្រូវបានធ្វើឡើង ដើម្បីចៀសវាងកើតមាននូវបញ្ហាដែលមិននឹកស្មានដល់ និងមិនមានហេតុផលនយោបាយនោះឡើយ។

កាលពីខែមិថុនា ទីក្រុងនៅភាគខាងត្បូងប្រទេសជប៉ុន បានអញ្ជើញតំណាងប្រទេស និងដែនដីរាប់សិបនាក់ឲ្យចូលរួមព្រឹត្តិការណ៍ថ្ងៃទី៩ ខែសីហា ជាថ្ងៃខួបនៃការទម្លាក់គ្រាប់បែកនុយក្លេអ៊ែររបស់អាមេរិក ក្នុងឆ្នាំ១៩៤៥។

អភិបាលក្រុង Nagasaki លោក Shiro Suzuki បានប្រាប់អ្នកសារព័ត៌មានថា ការសម្រេចនេះ គឺ «មិនមានហេតុផលនយោបាយនោះឡើយ» ប៉ុន្តែផ្អែកលើបំណងប្រាថ្នាដែលចង់ធានាឲ្យ «ការរៀបចំពិធីនេះ ស្ថិតក្នុងបរិយាកាសសន្តិភាព និងស្ងប់ស្ងាត់ ដែលឆ្លុះបញ្ចាំងពីភាពស្រងូតស្រងាត់»។

ទីក្រុងនេះបានសម្រេចមិនអញ្ជើញឯកអគ្គរដ្ឋទូត លោក Gilad Cohen ដោយសារតែ «ការអាចកើតមាននូវហានិភ័យ» ដែលកើតចេញពី «ការវិវឌ្ឍន៍ផ្សេងៗ នៅទូទាំងពិភពលោក ជុំវិញស្ថានភាពមជ្ឈិមបូព៌ាបច្ចុប្បន្ន»។ លោក Suzuki បាននិយាយថា ការព្រួយបារម្ភអំពីហានិភ័យនេះ នៅតែកើតមានដដែល ដោយពិពណ៌នាការមិនអញ្ជើញលោក Cohen ចូលរួមនេះថា ជា «ការសម្រេចដ៏លំបាកបំផុតមួយ»។

ចំណែកឯកអគ្គរដ្ឋទូតអ៊ីស្រាអែល បានហៅការសម្រេចថ្ងៃទី៣១ ខែកក្កដាថា ជារឿង «គួរឲ្យសោកស្តាយ» ហើយបាននិយាយថា ការធ្វើបែបនេះ គឺជា «ការផ្ញើសារខុសទៅកាន់ពិភពលោក»៕