អ៊ីរ៉ង់បានគំរាមដាក់ទោសយ៉ាងតឹងរ៉ឹងសម្រាប់អ៊ីស្រាអែល ដែលខ្លួននិយាយថាជាអ្នកទទួលខុសត្រូវក្នុងការធ្វើឃាតមេដឹកនាំក្រុមហាម៉ាសកាលពីថ្ងៃពុធសប្ដាហ៍នេះ។

អ៊ីស្រាអែលពុំបានធ្វើអត្ថាធិប្បាយដោយផ្ទាល់លើការវាយប្រហារដែលបានសម្លាប់ មេដឹកនាំនយោបាយក្រុមហាម៉ាស លោក Ismail Haniyeh នៅក្រុងតេអេរ៉ង់កាលពីព្រឹកថ្ងៃពុធនោះទេ។

ដោយសំអាងសាក្សីដែលនៅជាមួយ លោក Haniyeh លោកខាលីល អាល់ ហាយ៉ា (Khalil Al-Hayya) មន្ត្រីជាន់ខ្ពស់របស់ក្រុមហាម៉ាស បានប្រាប់សន្និសីទសារព័ត៌មានថា មីស៊ីលមួយគ្រាប់ បានវាយប្រហារដោយផ្ទាល់លើមេដឹកនាំរបស់ខ្លួនរូបនេះ។

ទោះបីជាយ៉ាងណាក៏ដោយ លោកនាយករដ្ឋមន្ត្រីអ៊ីស្រាអែល Benjamin Netanyahu បាននិយាយថា ប្រទេសរបស់លោកបានវាយបកយ៉ាងចាស់ដៃទៅលើសត្រូវរបស់ខ្លួនក្នុងរយៈពេលប៉ុន្មានថ្ងៃថ្មីៗនេះ រួមទាំងការសម្លាប់មេបញ្ជាការជាន់ខ្ពស់ក្រុមហេសបូឡា នៅក្នុងប្រទេសលីបង់ប៉ុន្មានម៉ោងមុនពេលការវាយប្រហារនៅទីក្រុង តេអេរ៉ង់ (Tehran) ។

លោកបានព្រមានអ៊ីស្រាអែលថា “ថ្ងៃដ៏លំបាកកំពុងរង់ចាំនៅខាងមុខ” ខណៈមានក្ដីបារម្ភកើនឡើងនៃការរីកកាន់តែធំក្នុងជម្លោះនៅមជ្ឈិមបូព៌ា។

លោកបានថ្លែងតាមទូរទស្សន៍ថា ចាប់តាំងពីការវាយប្រហារនៅរដ្ឋធានី បេរូត មានការគំរាមកំហែងជុំវិញពីគ្រប់ទិសទី។

យើងបានត្រៀមខ្លួនសម្រាប់សេណារីយ៉ូណាមួយ ហើយយើងនឹងឈរជាមួយគ្នា និងប្តេជ្ញាប្រឆាំងនឹងការគំរាមកំហែងណាមួយ៕