បាល់ទាត់៖ ក្រុមបាល់ទាត់ភ្នំពេញក្រោនបានបន្ថែម ៣ពិន្ទុទៀតហើយដើម្បីរក្សាកំណត់ត្រាមិនស្គាល់ចាញ់នៃលីគកំពូលកម្ពុជាឆ្នាំ២០២១ បន្ទាប់ពីយកឈ្នះក្រុមអាស៊ីអឺរ៉ុបយូណាយធីត ដោយលទ្ធផល ៥-០ ក្នុងជំនួបសប្ដាហ៍ទី១២ នៅកីឡដ្ឋាន Smart RSN កាលពីចុងសប្ដាហ៍កន្លងទៅ។
៥គ្រាប់ដែលជួយឲ្យក្រុមសិង្ហក្រហមទទួលបាន ៣ពិន្ទុបន្ថែមសុទ្ធតែកើតឡើងនៅវគ្គទី១ ដែលរកបានដោយកីឡាករ Adres Nieto, លឹម ពិសុទ្ធ, Yudai Ogawa, យ៉ើ ម៉ូស្លីម និង Valerii Hryshyn ម្នាក់ ១គ្រាប់ ។ ប៉ុន្ដែចូលវគ្គទី២ កីឡាករជម្រើសដំបូងរបស់ភ្នំពេញក្រោនភាគច្រើនត្រូវបានប្ដូរចេញ ហើយក៏មិនមានគ្រាប់បាល់កើតទៀតដែរ។ ចំណែកក្រុមអាស៊ីអឺរ៉ុបបន្ទាប់ពីបាត់បង់ខ្សែប្រយុទ្ធស្នូល និងជាក្បាលម៉ាស៊ីនរកគ្រាប់បាល់របស់ខ្លួនគឺកីឡាករ Abee Huber ដែលត្រូវបានផ្ទេរទៅក្លិបបឹងកេត ពួកគេហាក់មិនសូវមានឱកាសក្នុងការដាក់សម្ពាធក្នុងប្រអប់គ្រោះថ្នាក់របស់គូប្រកួតនោះទេ ជាក់ស្ដែងប្រកួតជាមួយអតីតក្រុមជើងឯកលីគ ៦សម័យនេះ ពួកគេមិនអាចបំប៉ោងសំណាញ់ទីក្រុមម្ចាស់ផ្ទះបានឡើយ។
ជ័យជម្នះនេះបានធ្វើឲ្យក្រុមភ្នំពេញក្រោនរំកិលទៅឈរលេខរៀងទី៣ និងមាន ២២ពិន្ទុស្មើក្រុមព្រះខ័នរាជស្វាយរៀង តែពួកគេទើបប្រកួតបាន ១០ប្រកួតប៉ុណ្ណោះដោយឈ្នះ៦ និងស្មើ៤ មិនទាន់ស្គាល់ពាក្យចាញ់ម្ដងឡើយ។ រីឯក្រុមអាស៊ីអឺរ៉ុបបានបន្ដឈរលេខរៀងទី៩ ដោយរក្សា ៧ពិន្ទុក្នុងដៃបន្ទាប់ពីឆ្លងកាត់ ១០ប្រកួតឈ្នះ២ ស្មើ១ និងចាញ់ ៧ប្រកួត៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
