នៅថ្ងៃព្រហស្បតិ៍នេះ មានរយៈពេល៧ខែ ចាប់តាំងពីការរញ្ជួយដីដ៏ធំ បានវាយប្រហារនៅឧបទ្វីប Noto ក្នុងខេត្ត Ishikawa ភាគកណ្តាលប្រទេសជប៉ុន។ ចំនួនអ្នកស្លាប់ ត្រូវបានគេរំពឹងថានឹងកើនឡើងដល់៣៣៩នាក់ ខណៈចំនួនអ្នកស្លាប់ដោយសារមូលហេតុផ្សេងៗក្រោយគ្រោះមហន្តរាយ កំពុងកើនឡើង។ មនុស្សសរុបចំនួន២៩៩នាក់ ត្រូវបានបញ្ជាក់ថាស្លាប់ នៅក្នុងខេត្តនេះ បន្ទាប់ពីគ្រោះរញ្ជួយដីកម្រិត ៧,៧ រិចទ័រ បានវាយប្រហារឧបទ្វីប កាលពីថ្ងៃចូលឆ្នាំសកល ហើយមនុស្ស៣នាក់ បាត់ខ្លួន។

អ្នកស្លាប់រួមមានមនុស្ស៧០នាក់ បានស្លាប់បន្ទាប់ពីធ្លាក់ខ្លួនឈឺ ដោយសារមូលហេតុនៅក្រោយគ្រោះមហន្តរាយ រួមមានភាពអស់កម្លាំង និងភាពតានតឹងផ្លូវចិត្ត។ អាជ្ញាធរ ត្រូវបានស្នើឱ្យទទួលស្គាល់អ្នកស្លាប់ចំនួន ៤០ នាក់ផ្សេងទៀតថា មកពីមូលហេតុក្រោយគ្រោះមហន្តរាយ។

ប្រសិនបើពួកគេ ត្រូវបានទទួលស្គាល់ ចំនួនអ្នកស្លាប់សរុបនឹងកើនឡើងដល់៣៣៩នាក់។ ចំនួនអ្នកដែលនៅតែរស់នៅក្នុងទីជម្រកក្នុងខេត្ត Ishikawa មានចំនួន១.៤២២នាក់ គិតត្រឹម ថ្ងៃអង្គារ។

ក្នុងចំណោមអ្នកទាំងនេះ អ្នកជម្លៀសខ្លួនចំនួន៧០៥នាក់ បានស្នាក់អាស្រ័យនៅសណ្ឋាគារ និងផ្ទះសំណាក់ជាដើម។

ប៉ុន្តែរដ្ឋាភិបាលខេត្ត Ishikawa និយាយថា ជាគោលការណ៍ អ្នកជម្លៀស អាចស្នាក់នៅកន្លែងទាំងនោះបាន រហូតដល់ដំណាច់ខែសីហា។ រដ្ឋាភិបាល ក្នុងតំបន់និយាយថា ប្រសិនបើមនុស្សមួយចំនួនពុំអាចចាកចេញពីទីកន្លែងនានាតាមពេលវេលាកំណត់សម្រាប់ហេតុផលជាក់លាក់ណាមួយ នោះរដ្ឋាភិបាលនឹងសម្រេចថានឹងត្រូវធ្វើអ្វីតាមករណីនីមួយៗ។

រដ្ឋាភិបាលខេត្ត Ishikawa ប៉ាន់ប្រមាណថា លំនៅឋានបណ្តោះអាសន្នចំនួន ៦.៨០៤ខ្នង ត្រូវការជាចាំបាច់ ដើម្បីឲ្យអ្នកជម្លៀសខ្លួនស្នាក់នៅ ហើយលំនៅឋានប្រហែល៩០ភាគរយ គ្រោងនឹងបញ្ចប់នៅចុងខែសីហានេះ។ ប៉ុន្តែមួយចំនួន ត្រូវបានគេរំពឹងថានឹងរួចរាល់នៅខែវិច្ឆិកា។