ប្រធានាធិបតីប្រទេសវេណេស៊ុយអេឡា លោក Nicolas Maduro កាលពីថ្ងៃពុធ បានផ្ញើសេចក្តីអំពាវនាវ ទៅកាន់សភាបោះឆ្នោតនៃតុលាការយុត្តិធម៌កំពូល ដើម្បីធ្វើសវនកម្ម និងបញ្ជាក់ពីលទ្ធផលនៃការបោះឆ្នោតប្រធានាធិបតី កាលពីថ្ងៃអាទិត្យ ក្នុងពេលមានការអំពាវនាវ ឱ្យមានតម្លាភាពកាន់តែខ្លាំងឡើង។

លោក Maduro បានស្នើឱ្យតុលាការកំពូល កោះហៅស្ថាប័នពាក់ព័ន្ធ ដើម្បីប្រៀបធៀបសមាសភាពនៃភស្តុតាងទាំងអស់ និងបញ្ជាក់ ដោយការអនុវត្តមតិរបស់អ្នកជំនាញក្នុងកម្រិតបច្ចេកទេសខ្ពស់បំផុត ចំពោះលទ្ធផលបោះឆ្នោតកាលពីថ្ងៃទី២៨ ខែកក្កដា។

លោក បានទៅដល់តុលាការកំពូល រួមដំណើរដោយស្រ្តីទីមួយ លោកស្រី Cilia Flores អនុប្រធានាធិបតីលោកស្រី ដែលស៊ី រ៉ូទ្រូហ្គេស(Delcy Rodriguez) ប្រធានសភាលោក Jorge Rodriguez រដ្ឋអាជ្ញាលោក Reinaldo Munoz និងរដ្ឋមន្ត្រីក្រសួងការបរទេស លោក Yvan Gil ក្នុងចំណោមសមាជិកផ្សេងទៀត នៃគណៈរដ្ឋមន្ត្រីរបស់លោក។

នៅក្នុងសុន្ទរកថាទៅកាន់អ្នកសារព័ត៌មាន នៅពេលចាកចេញពីតុលាការ លោក Maduro បាននិយាយថា លោកបានប្រាប់សភាបោះឆ្នោតថា លោកសុខចិត្តឲ្យគេកោះហៅ សួរចម្លើយ និងស៊ើបអង្កេតដោយសភាបោះឆ្នោត ក្នុងនាមជាបេក្ខជនប្រធានាធិបតីដែលទទួលជ័យជម្នះក្នុងការបោះឆ្នោត កាលពីថ្ងៃអាទិត្យ និងជាប្រមុខរដ្ឋ។