ការព្រួយបារម្ភបានកើនឡើងខ្លាំងក្នុងចំណោមប្រជាជនអ៊ីស្រាអែល កាលពីថ្ងៃពុធ (៣១ កក្កដា) ចំពោះជោគវាសនារបស់ចំណាប់ថ្នូរជាង ១០០នាក់ ដែលនៅតែជាប់ខ្លួននៅក្នុងតំបន់ហ្កាហ្សា បន្ទាប់ពីការសម្លាប់ប្រមុខក្រុមហាម៉ាស លោក អ៊ីស្មេល ហានីយេ (Ismail Haniyeh) នៅទីក្រុងតេអេរ៉ង់ ប្រទេសអ៊ីរ៉ង់។

អ្នកស្រុកនៅទីក្រុងឆ្នេរ ហៃហ្វា (Haifa) របស់អ៊ីស្រាអែល បាននិយាយថា ការសម្លាប់លោក Haniyeh «គឺជាកំហុសឆ្គងមួយ ដែលគំរាមកំហែងដល់លទ្ធភាពនៃការនាំមកចំណាប់ថ្នូរមកវិញ»។ អ្នកស្រុកម្នាក់ទៀតនិយាយថា «យើងនឹងសប្បាយចិត្តនៅពេលណាដែលចំណាប់ថ្នូរបានត្រលប់មកផ្ទះវិញ ហើយសង្រ្គាមនឹងបញ្ចប់ ប៉ុន្តែពេលនេះមានតែការព្រួយបារម្ភប៉ុណ្ណោះ»។

ក្នុងនាមជាប្រធាននយោបាយនៃចលនាប៉ាឡេស្ទីន ហាម៉ាស លោក Haniyeh បានមើលការខុសត្រូវលើការចរចារសម្រាប់កិច្ចព្រមព្រៀងបញ្ចប់សង្គ្រាមនៅហ្កាហ្សា និងដោះលែងចំណាប់ថ្នូរ ដែលឃុំខ្លួនក្នុងទឹកដីហ៊ុមព័ទ្ធនេះ ជាថ្នូរនឹងអ្នកទោសប៉ាឡេស្ទីននៅអ៊ីស្រាអែល។

ក្រុមហាម៉ាស បានចាប់ចំណាប់ថ្នូរជាង ២៥០នាក់ ដែលក្នុងនោះជាង ១០០នាក់នៅតែជាប់ឃុំខ្លួននៅហ្កាហ្សា រួមទាំងមនុស្ស ៣៩នាក់ដែលទាហានអ៊ីស្រាអែល អះអាងថាបានស្លាប់។ ការចរចាជាច្រើនខែដែលសម្របសម្រួលដោយកាតា និងអេហ្ស៊ីប ដោយមានការគាំទ្រពីសហរដ្ឋអាមេរិក រវាងក្រុមហាម៉ាស និងអ៊ីស្រាអែល បានបរាជ័យក្នុងការឈានដល់បទឈប់បាញ់ និងកិច្ចព្រមព្រៀងដោះលែងចំណាប់ថ្នូរ។ ទាំងអ៊ីស្រាអែល និងក្រុមហាម៉ាស បានបន្ទោសគ្នាទៅវិញទៅមកចំពោះការពន្យារពេលក្នុងការសម្រេចកិច្ចព្រមព្រៀងនេះ៕