នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ ( Benjamin Netanyahu) បាននិយាយកាលពីថ្ងៃពុធថា អ៊ីស្រាអែល នឹងឆ្លើយតបដោយកម្លាំងដ៏លើសលប់ចំពោះការវាយប្រហារតបតវិញ បន្ទាប់ពីមានការសម្លាប់ប្រធានការិយាល័យនយោបាយរបស់ក្រុមហាម៉ាស លោក អ៊ីស្មេល ហានីយេ (Ismail Haniyeh) នៅក្នុងទីក្រុងតេអេរ៉ង់ និងមេដឹកនាំជាន់ខ្ពស់របស់ក្រុមហេសបូឡានៅទីក្រុងបេរូត(Beirut) ។

លោក ណេតាន់យ៉ាហ៊ូ បាននិយាយក្នុងសុន្ទរកថាតាមទូរទស្សន៍ទៅកាន់ប្រជាជាតិថា៖«ថ្ងៃដ៏លំបាក គឺនៅខាងមុខ» ដោយកត់សម្គាល់ថា «ចាប់តាំងពីការវាយប្រហារនៅទីក្រុងបេរូត ការគំរាមកំហែង ត្រូវបានឮពីគ្រប់ទីកន្លែង»។

លោក បាននិយាយថា ប្រទេសនេះ បានត្រៀមខ្លួនជាស្រេច «សម្រាប់ស្ថានភាពណាមួយ» ដោយបន្ថែមថា ខ្លួននឹង«ប្រើកម្លាំងដ៏លើសលប់ប្រឆាំងនឹងការឈ្លានពានណាមួយ ពីក្រុមណាមួយនោះ»។

លោក ណេតាន់យ៉ាហ៊ូ បានបញ្ជាក់ថា ក្នុងរយៈពេលប៉ុន្មានថ្ងៃថ្មីៗនេះ អ៊ីស្រាអែល បានកំណត់គោលដៅលើសម្ព័ន្ធមិត្តសកម្មប្រយុទ្ធរបស់អ៊ីរ៉ង់ ដោយលើកឡើងពីការវាយប្រហារ នៅក្នុងប្រទេសយេម៉ែន និងលីបង់ ដែលបានសម្លាប់លោក Fouad Shokor ដែលជាមេបញ្ជាការយោធាជាន់ខ្ពស់របស់ក្រុមហេសបូឡា កាលពីយប់ថ្ងៃពុធ។

លោក ណេតាន់យ៉ាហ៊ូ បានរក្សាជំហរដ៏រឹងរូសប្រឆាំងនឹងការអំពាវនាវអន្តរជាតិ ឲ្យបញ្ចប់ការវាយលុករបស់អ៊ីស្រាអែល នៅតំបន់ហ្កាហ្សា ។ «ខ្ញុំមិនចុះចាញ់នឹងសំឡេងទាំងនេះទេ»។