អ្នកនាំពាក្យយោធាអ៊ីរ៉ាក់ លោក Yahya Rasoul បាននិយាយកាលពីថ្ងៃពុធថា ប្រទេសអ៊ីរ៉ាក់ បានឲ្យកងកម្លាំងចម្រុះដឹកនាំដោយសហរដ្ឋអាមេរិក ទទួលខុសត្រូវចំពោះការវាយប្រហារលើកងកម្លាំងយោធាអ៊ីរ៉ាក់ Hashd Shaabi ក្នុងខេត្ត Babil ភាគខាងត្បូងទីក្រុងបាកដាដ។

លោក Rasoul បាននិយាយនៅក្នុងសេចក្តីថ្លែងការណ៍មួយថា៖«កងកម្លាំងចម្រុះ បានប្រព្រឹត្តបទឧក្រិដ្ឋដ៏សាហាវ និងការឈ្លានពានដោយឥតលាក់លៀម» នៅពេលដែលពួកគេ បានកំណត់គោលដៅលើមូលដ្ឋានយោធាដែលជាកម្មសិទ្ធរបស់កងកម្លាំងសន្តិសុខអ៊ីរ៉ាក់ នៅក្នុងខេត្ត Babil ភាគខាងជើង កាលពីយប់ថ្ងៃអង្គារ ដោយបានបណ្តាលឲ្យស្លាប់ និងរបួសសមាជិកជាច្រើននាក់នៃកងកម្លាំង Hashd Shaabi។

លោក បានព្រមានថា ការវាយប្រហារបែបនេះ អាចប៉ះពាល់យ៉ាងខ្លាំងដល់កិច្ចខិតខំប្រឹងប្រែង យន្តការ និងក្របខ័ណ្ឌការងារសន្តិសុខរួមគ្នា ដើម្បីប្រយុទ្ធប្រឆាំងនឹងក្រុមរដ្ឋឥស្លាម (IS) នៅអ៊ីរ៉ាក់ និងស៊ីរី ដោយបន្ថែមថា ការវាយប្រហារនេះ ក៏ប្រថុយនឹងអូសទាញអ៊ីរ៉ាក់ និងតំបន់ទាំងមូល ទៅក្នុងជម្លោះ និងសង្រ្គាមដ៏គ្រោះថ្នាក់ផងដែរ។

អ្នកនាំពាក្យរូបនេះ បានសង្កត់ធ្ងន់ថា អ៊ីរ៉ាក់ នឹងចាត់វិធានការតាមផ្លូវច្បាប់ និងការទូតដ៏សមស្រប ដើម្បីការពារសិទ្ធិ និងធានាសន្តិសុខ និងអធិបតេយ្យភាពរបស់ខ្លួន។

គួរបញ្ជាក់ផងដែរ កាលពីយប់ថ្ងៃអង្គារ ប្រភពក្រសួងមហាផ្ទៃ បានប្រាប់សារព័ត៌មានស៊ីនហួថា យានដ្រូនមិនស្គាល់អត្តសញ្ញាណ បានទម្លាក់គ្រាប់បែកលើមូលដ្ឋានយោធានៃកងកម្លាំង Hashd Shaabi ដែលត្រូវបានគេស្គាល់ថា ជាកងកម្លាំងចល័តប្រជាប្រិយ នៅក្នុងតំបន់ Jurf al-Nasr ភាគខាងជើងនៃខេត្ត Babil។