សារព័ត៌មាន Bloomberg បាននិយាយដោយដកស្រង់ប្រភពថា យន្តហោះចម្បាំង F-16 ក្រុមដំបូងដែលផ្គត់ផ្គង់ដោយសមាជិកណាតូ បានមកដល់អ៊ុយក្រែនហើយ។

យោងតាមទីភ្នាក់ងារព័ត៌មាននេះ «ចំនួនយន្តហោះចម្បាំង គឺតិចណាស់»។ ប្រភពបានបន្ថែមថា វាមិនច្បាស់ទេថាតើអ្នកបើកយន្តហោះអ៊ុយក្រែន ដែលបានហ្វឹកហាត់នៅលោកខាងលិចកាលពីប៉ុន្មានខែមុននឹង «ប្រើប្រាស់យន្តហោះចម្បាំងភ្លាមៗ ឬដំណើរការនេះ នឹងចំណាយពេលយូរជាងនេះឬយ៉ាងណា»។

សារព័ត៌មាន Bloomberg មិនបានបញ្ជាក់លម្អិតអំពីចំនួនពិតប្រាកដនៃយន្តហោះចម្បាំង និងឈ្មោះប្រទេសដែលបានបញ្ជូនពួកវា ទៅកាន់ទីក្រុងគីវនោះទេ។ ទីភ្នាក់ងារនេះ បាននិយាយថា ការបញ្ជូនយន្តហោះចម្បាំង F-16 គឺជា «ការសម្រេចដែលរង់ចាំជាយូរមកហើយ» ដែលចំណាយពេលជាងមួយឆ្នាំ ដើម្បីបញ្ចប់ការបញ្ជូន។

មុននេះ ប្រធានាធិបតីអ៊ុយក្រែន លោក វ្ល៉ូឌីមី ហ្ស៊េឡិនស្គី (Vladimir Zelensky) បានត្អូញត្អែរថា យន្តហោះ F-16s ដែលបានសន្យាជាមួយទីក្រុងគីវ ដោយបណ្តាប្រទេសលោកខាងលិច នៅតែមិនទាន់មកដល់នៅឡើយ។ កាលពីថ្ងៃទី១០ ខែកក្កដា សេតវិមាន បានចេញសេចក្តីថ្លែងការណ៍រួមរបស់មេដឹកនាំនៃប្រទេសដាណឺម៉ាក ហូឡង់ និងសហរដ្ឋអាមេរិក ស្តីពីផែនការបញ្ជូនយន្តហោះចម្បាំង F-16 ទៅកាន់អ៊ុយក្រែន។ ប្រធានាធិបតីអាមេរិក ចូ បៃដិន បាននិយាយថា៖«យើងកំពុងធ្វើការជាមួយសម្ព័ន្ធមិត្តណាតូរបស់យើង ដើម្បីធានាថា អ៊ុយក្រែន នឹងអាចប្រើយន្តហោះ F-16 នៅរដូវក្តៅនេះ»។