ទូរទស្សន៍ SNN បាននិយាយថា ទីប្រឹក្សាយោធាអ៊ីរ៉ង់ លោក Milad Bidi ត្រូវបានសម្លាប់ នៅក្នុងការវាយប្រហារតាមអាកាសរបស់អ៊ីស្រាអែលលើទីក្រុងបេរូត កាលពីថ្ងៃទី ៣០ ខែកក្កដា។

ទូរទស្សន៍នេះ បាននិយាយនៅក្នុងសេចក្តីថ្លែងការណ៍មួយថា៖«លោក Milad Bidi ដែលជាទីប្រឹក្សាយោធាម្នាក់របស់អ៊ីរ៉ង់ ត្រូវបានសម្លាប់ នៅក្នុងការវាយប្រហាររបស់ក្រុមយុទ្ធជនរបបជ្វីហ្វ ទៅលើទីក្រុងបេរូត»។

ទីភ្នាក់ងារសារព័ត៌មាន Mehr បាននិយាយថា សាកសពរបស់លោក Bidi ត្រូវបានគេកំណត់អត្តសញ្ញាណកាលពីប៉ុន្មានម៉ោងមុន។ យោងតាមទីភ្នាក់ងារព័ត៌មាននេះ លោកបានរស់នៅក្បែរលោក Fuad Shukr ដែលជាមេបញ្ជាការយោធាហេសបូឡា។

កាលពីល្ងាចថ្ងៃទី៣០ ខែកក្កដា កងទ័ពអ៊ីស្រាអែល បាននិយាយថា ការវាយប្រហារមួយ បានធ្វើឡើងទៅលើរដ្ឋធានីបេរូតរបស់ប្រទេសលីបង់។ យោធាបានបញ្ជាក់ថា ប្រតិបត្តិការច្បាស់លាស់ បានសម្លាប់លោក Shukr ដែលអ៊ីស្រាអែលជឿថា ជាជំនួយការរបស់មេដឹកនាំហេសបូឡា លោក Hassan Nasrullah ទទួលបន្ទុកបញ្ហាយុទ្ធសាស្ត្រ រួមទាំងអាវុធមីស៊ីលផងដែរ។ អ៊ីស្រាអែល អះអាងថា លោក Shukr គឺជាអ្នកនៅពីក្រោយការវាយប្រហារកាលពីថ្ងៃទី ២៧ ខែកក្កដា ទៅលើសហគមន៍Druze នៃទីក្រុង Majdal Shams ក្នុងតំបន់ខ្ពង់រាប Golan Heights ដែលគ្រប់គ្រងដោយអ៊ីស្រាអែល ជាទីដែលកុមារ ១២នាក់ ត្រូវបាន  សម្លាប់។ មុននេះ ក្រុមហេសបូឡា បានបដិសេធថា មិនជាប់ពាក់ព័ន្ធនឹងការវាយប្រហារនោះទេ។