​បាល់ទាត់៖ ខ្សែប្រយុទ្ធ​សញ្ជាតិ​អេ​ស្ប៉ា​ញ Muguel Angel Junco Martinez ហៅ Mika បា​នរក​គ្រាប់​បាល់ Hat-Trick ៣​គ្រាប់​ម្នាក់ឯងជួយ​ឲ្យ​ក្រុមព្រះ​ខ័ន​រាជ​ស្វាយរៀង វាយបក​យកឈ្នះ​ក្រុម​ភ្ញៀវ​សមាគម​កីឡាបាល់ទាត់​កងយោធពល​ខេមរភូមិន្ទ​ (Tiffy Army) ដោយ​លទ្ធផល ៣-២ ក្នុងជំនួប​សប្ដាហ៍​ទី​១២ នៃ​លី​គ​កំពូល​កម្ពុជាឆ្នាំ​២០២១ កាលពី​ល្ងាច​ថ្ងៃទី​០៥ ខែកញ្ញា។​

​គូ​ឯក​ប្រចាំ​សប្ដាហ៍នា​កីឡដ្ឋាន​ខេត្តស្វាយរៀង​នេះ វគ្គ​ទី​១ ក្រុម​ទាំងពីរ មិនអាច​បំប៉ោង​សំណាញ់​ទី​គ្នា​បាន​នោះទេ។ ប៉ុន្ដែ​ចូល​វគ្គ​ទី​២ ត្រឹម​រយៈពេល​ប្រមាណ ១៥​នាទី ក្រុម​កងយោធពល​ខេ​មរ​ផ​ភូមិន្ទបាន​ស៊ុត​បើក​ការ​នាំមុខ​ក្រុម​ម្ចាស់ផ្ទះ ២​គ្រាប់​មុន ដែល​ស៊ុត​ពី​ចម្ងាយ​ដោយ​កីឡាករ​ជប៉ុន Yuta Kikuchi នៅ​នាទី​៤៩ និង​កីឡាករ ណា​រ៉ុង កក្កដា នៅ​នាទី​៦២។​ ​ប៉ុន្ដែ​រយៈពេល ១៥​នាទី​ចុង​ម៉ោង ព្រះខ័ន​រាជ​ស្វាយរៀងបាន​ព្យាយាម​វាយបករហូត​រកបាន ៣​គ្រាប់​ត្រឡប់មកវិញដោយ​កីឡាករ Mika ម្នាក់ឯងនៅ​នាទី​៧៦ ក្រោយ​ឆក់​បាល់​បាន​ពី​ខ្សែការពារ​ក្រុម Tiffy Army ខណៈ ២​គ្រាប់​ទៀតធ្វើបាន​សម្រេច​ដោយ​ការទា​ត់បាល់​ប៉េ​ណា​ល់​ទី នៅ​នាទី​៨១ បន្ទាប់ពី​អ្នកចាំទី គង់ រ៉ា​ហ្វា​ត់ បង្កកំហុស​លើ ប្រាក់ មុន្នី​ឧ​ត្ត​ម និង​នៅ​នាទី​៩០+៣ បន្ទាប់ពី​បាល់​ប៉ះ​ដៃ ឈិន ឈឿន ក្នុង​ប្រអប់។​

​ការ​វាយបក​ពី​សំណាក់​ក្រុម​ម្ចាស់ផ្ទះ បានធ្វើ​ឲ្យ​ក្រុម​លោក Conor Nestor យកឈ្នះ​លើ​ក្រុម​លោក Lee Tae Hoon ក្នុង​លទ្ធផល​បច្ចេកទេស ៣-២។ ជ័យជម្នះ​នេះធ្វើ​ឲ្យ​ក្រុមព្រះ​ខ័ន​រាជ​ស្វាយរៀងឡើងឈរ​លេខ​រៀង​ទី​២ បណ្ដោះអាសន្នដោយមាន ២២​ពិន្ទុ​ស្មើគ្នា​ជាមួយ​ភ្នំពេញ​ក្រោ​ន បន្ទាប់ពី​ប្រកួត ១១​លើក​ឈ្នះ​៧ ស្មើ​១ និង​ចាញ់៣ ស្របពេល​ក្រុម​កងយោធពល​ខេមរភូមិន្ទបន្ដ​ឈរ​លេខ​រៀង​ទី​៧ និង​មាន ១៦​ពិន្ទុ​ក្នុង​ដៃក្រោយ​ប្រកួត ១១​លើក​ឈ្នះ​៤ ស្មើ៤ និង​ចាញ់ ៣​ប្រកួត៕

អត្ថបទ៖ លី ឈុន​ឡា