ដោយដកស្រង់សម្ដីពីមន្ត្រីមន្ទីរបញ្ចកោណដែលនិយាយក្នុងលក្ខខណ្ឌមិនបញ្ចេញឈ្មោះ សារព័ត៌មាន New York Times (The Times) កាលពីថ្ងៃពុធ (ទី៣១ ខែកក្កដា) បានរាយការណ៍ថា ជនសង្ស័យ ដែលត្រូវបានចោទប្រកាន់ពីបទរៀបគម្រោងវាយប្រហារថ្ងៃទី ១១ ខែកញ្ញា (ឆ្នាំ២០០១) គឺលោក Khalid Sheikh Mohammed និងបក្ខពួក ២នាក់ទៀត ដែលត្រូវបានឃុំខ្លួននៅពន្ធនាគារ Guantanamo បានយល់ព្រមផ្ដល់ចម្លើយពីភាពមានទោស ចំពោះការចោទប្រកាន់ពីបទសមគំនិត ជាថ្នូរនឹងការជាប់ទោសអស់ ១ជីវិត។

សារព័ត៌មាន The Times បានឲ្យដឹងថា កិច្ចព្រមព្រៀង ដើម្បីផ្ដល់ចម្លើយពីភាពមានទោសរបស់លោក Mohammed លោក Walid Bin Attash និងលោក Mustafa al-Hawasawi ជាជាងត្រូវបានកាត់ទោសប្រហារជីវិតនោះ ទទួលបានការអនុម័តពីមន្ត្រីជាន់ខ្ពស់របស់មន្ទីរបញ្ចកោណ។

គួរបញ្ជាក់ថា បុរសទាំង ៣នាក់នោះ ត្រូវបានឃុំខ្លួនតាំងពីឆ្នាំ២០០៣ មកម៉្លេះ។ លោក Mohammed គឺជាសកម្មប្រយុទ្ធអាល់កៃដាដែលត្រូវបានចោទប្រកាន់ដោយសហរដ្ឋអាមេរិកថា ជាអ្នករៀបចំផែនការដ៏សំខាន់នៃការវាយប្រហារកាលពីថ្ងៃទី១១ ខែកញ្ញា ឆ្នាំ២០០១ លើមជ្ឈមណ្ឌលពាណិជ្ជកម្មពិភពលោក នៅទីក្រុងញូវយ៉ក និងមន្ទីរបញ្ចកោណនៅខាងក្រៅទីក្រុងវ៉ាស៊ីនតោន។

សារព័ត៌មាន The Times បានរាយការណ៍ថា អគ្គរដ្ឋអាជ្ញា លោក Aaron Rugh នៅក្នុងលិខិតមួយទៅកាន់សមាជិកគ្រួសារនៃជនរងគ្រោះថ្ងៃទី១១ ខែកញ្ញា បានរៀបរាប់ថា៖ «ជាថ្នូរនឹងការលុបចោលនូវទោសប្រហារជីវិត ដោយជំនួសមកវិញជាមួយនឹងការដាក់ទណ្ឌកម្មដែលអាចធ្វើទៅបាន ជនជាប់ចោទទាំង ៣នាក់នេះ បានយល់ព្រមផ្ដល់ចម្លើយពីភាពមានទោស ចំពោះបទល្មើសដែលត្រូវបានចោទប្រកាន់ទាំងអស់ ក្នុងនោះរួមទាំងឃាតកម្មលើមនុស្សចំនួន ២.៩៧៦នាក់ ដែលមានក្នុងបញ្ជីចោទប្រកាន់ផងដែរ»៕