ប្រទេសចិនបានបង្ហាញមេបញ្ជាការកងទ័ពថ្មី សម្រាប់តំបន់ភាគខាងត្បូង ចំពេលមានជម្លោះកាន់តែកើនឡើង នៅសមុទ្រចិនខាងត្បូង។

យោងតាមរបាយការណ៍របស់ប្រព័ន្ធផ្សព្វផ្សាយ កាលពីថ្ងៃពុធ (ទី៣១ ខែកក្កដា) បានឲ្យដឹងថា លោកឧត្តមសេនីយ៍ Wu Yanan ត្រូវបានតែងតាំងជាមេបញ្ជាការទីបញ្ជាការភាគខាងត្បូងដែលមានភារកិច្ចត្រួតពិនិត្យយុទ្ធសាស្ត្រយោធា នៅសមុទ្រចិនខាងត្បូង។

លោកឧត្តមសេនីយ៍ Wu វ័យ ៦១ឆ្នាំ មានបទពិសោធន៍ច្រើន នៅក្នុងកងកម្លាំងកងទ័ពជើងគោក។ ពីមុនលោកបានបម្រើការជាមេបញ្ជាការនៃទីបញ្ជាការមជ្ឈិម។ ការតែងតាំងថ្មីនេះបានកើតឡើងនៅពេលដែលភាពតានតឹង កំពុងកើនឡើងនៅក្នុងដែនទឹក ដែលប្រទេសចិន និងប្រទេសជិតខាង ក្នុងនោះរួមមានទាំងហ្វីលីពីន និងវៀតណាមផងដែរ ទាមទារដែនដីត្រួតស៊ីគ្នា។

លោកឧត្តមសេនីយ៍ Wu ត្រូវជំនួសតំណែងមេបញ្ជាការមុន គឺលោក Wang Xiubin។ មិនមានហេតុផលជាក់លាក់ផ្លូវការណាមួយដែលត្រូវបានផ្តល់ឲ្យ ពាក់ព័ន្ធនឹងការចាកចេញរបស់លោកឧត្តមសេនីយ៍ Wang ឬពីជំហានបន្ទាប់សម្រាប់បុរសវ័យ ៦០ឆ្នាំរូបនោះឡើយ៕