បាល់ទាត់៖ ក្រុមសូលទីឡូអង្គរបានបន្ថែម ១ពិន្ទុទៀតហើយក្រោយប្រកួតស្មើក្រុមខ្លាំងអង្គរថាយហ្គឺរដោយលទ្ធផល ០-០ ក្នុងជំនួបសប្ដាហ៍ទី១២ នៃលីគកំពូលកម្ពុជានៅកីឡដ្ឋាន SRU ខេត្តសៀមរាបកាលពីចុងសប្ដាហ៍កន្លងទៅ។
ជំនួបត្រូវបានឲ្យឈ្មោះថា Siem Reap Derby ក្រុមទាំងពីរបានព្យាយាមដាក់សម្ពាធគ្នាទៅវិញទៅមកស្ទើរពេញ ៩០នាទី តែគ្មានក្រុមណាអាចបំប៉ោងសំណាញ់ទីគ្នាបានឡើយ ពិសេសក្រុមខ្លាទឹកក្រូចអង្គរថាយហ្គឺរ ដែលមានឱកាសទាត់ក្នុងប្រអប់ជាច្រើនលើក តែធ្វើមិនបានសម្រេចដោយបានត្រឹមទាត់បាល់ប៉ះបង្គោលទីប៉ុណ្ណោះ។ ជាមួយការចែកគ្នា ១ពិន្ទុម្នាក់នេះ បានធ្វើឲ្យអ្នកគាំទ្រមានការភ្ញាក់ផ្អើលជាថ្មី ពិសេសចំពោះក្រុមសូលទីឡូអង្គរដែលរកបានពិន្ទុជាបន្ដបន្ទាប់ ក្រោយរងបរាជ័យ ៧ប្រកួតផ្ទួនៗកាលពីដើមរដូវកាល ជាក់ស្ដែង ៣ប្រកួតចុងក្រោយក្រោមការដឹកនាំរបស់គ្រូបង្វឹកវ័យក្មេងលោក អ៊ុក សុធី សូលទីឡូអង្គររកបាន ៥ពិន្ទុ ដើម្បីគេចចេញពីតំបន់កាត់ចេញ ក្រោយប្រកួតស្មើណាហ្គាវើលដ៏ ៣-៣, ឈ្នះក្រុមនគរបាលជាតិ ៣-២ មុនស្មើអង្គរថាយហ្គឺរ ០-០ ពេលនេះ។
ដោយឡែកក្រុមមានមូលដ្ឋាននៅខេត្តសៀមរាបដូចគ្នា គឺក្រុមអង្គរថាយហ្គឺរហាក់ធ្វើមិនសូវបានល្អឡើយសម្រាប់ ៤ប្រកួតចុងក្រោយ បន្ទាប់ពីចាញ់វិសាខា ៣-១, ចាញ់ណាហ្គាវើលដ៏ ២-១, ស្មើអាស៊ីអឺរ៉ុបយូណាយធីត ២-២ ឥលូវមកស្មើក្រុមសូលទីឡូអង្គរ ០-០ ទៀត ដែលនាំឲ្យក្រុមធ្វើបានយ៉ាងល្អកាលពីដើមរដូវកាលនេះ ធ្លាក់មកឈរលេខរៀងទី៥ បណ្ដោះអាសន្ន បន្ទាប់ពីប្រកួត ១១លើកឈ្នះ៦ ស្មើ៣ និងចាញ់ ២ប្រកួតរកបាន ២១ពិន្ទុស្មើក្រុមការពារតំណែងជើងឯកបឹងកេត៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
