ក្រសួងការពារជាតិរុស្ស៊ី បាននិយាយនៅក្នុងសេចក្តីថ្លែងការណ៍នៅថ្ងៃព្រហស្បតិ៍នេះថា កងទ័ពជើងទឹករុស្ស៊ី បានបញ្ចប់សមយុទ្ធយោធាទ្រង់ទ្រាយធំ ចូលរួមដោយកងនាវាតំបន់បាល់ទិក តំបន់ភាគខាងជើង និងតំបន់ប៉ាស៊ីហ្វិក ព្រមទាំងកងនាវា Flotilla សមុទ្រកាសព្យែន។

អង្គភាព និងរចនាសម្ព័ន្ធនៃកងនាវារុស្ស៊ី បានមកចូលរួមក្នុងសមយុទ្ធ ដែលកំណត់ពេល នៅក្នុងតំបន់ប្រតិបត្តិការនៃកងនាវាភាគខាងជើង កងនាវាតំបន់ប៉ាស៊ីហ្វិក និងតំបន់បាល់ទិក ព្រមទាំងតំបន់ទទួលខុសត្រូវរបស់កងនាវា Flotilla សមុទ្រកាសព្យែន បានចាប់ផ្តើមដកកងកម្លាំងត្រឡប់ទៅវិញ។ 

សេចក្តីថ្លែងការណ៍ បាននិយាយថា ក្រុមនាវិក ដែលអនុវត្តការងារហ្វឹកហ្វឺន និងប្រយុទ្ធ តាមការចាត់តាំង នឹងត្រឡប់ទៅមូលដ្ឋានអចិន្ត្រៃយ៍របស់ពួកគេវិញ ក្នុងពេលឆាប់ៗនេះ។

មេបញ្ជាការកងទ័ពជើងទឹក លោក Alexander Moiseyev បាននិយាយថា សមយុទ្ធសម្រេចបានគោលដៅរបស់ពួកគេក្នុងការវាយតម្លៃសកម្មភាពរបស់អាជ្ញាធរទីបញ្ជាការកងទ័ពជើងទឹកគ្រប់លំដាប់ថ្នាក់ និងផ្ទៀងផ្ទាត់ការត្រៀមខ្លួនរបស់ក្រុមនាវិក កងអាកាសចរណ៍កងទ័ពជើងទឹក និងកងល្បាតឆ្នេរ ដើម្បីបំពេញភារកិច្ចដែលចាត់តាំង។

លោក Moiseyev បាននិយាយថា នាយសេនាធិការកងទ័ពជើងទឹក នឹងធ្វើការវិភាគលម្អិតអំពីសកម្មភាពរបស់កងកម្លាំងនៅលើផ្ទៃទឹក ផ្នែកអាកាសចរណ៍កងទ័ពជើងទឹក និងអង្គភាពល្បាតឆ្នេរ ជាផ្នែកមួយនៃសកម្មភាពហ្វឹកហ្វឺនប្រយុទ្ធទ្រង់ទ្រាយធំ។ 

នាវាលើផ្ទៃទឹកមានចំនួនប្រហែល ៣០០ គ្រឿង មានទូក នាវាមុជទឹក និងនាវាគាំទ្រ មានយន្តហោះប្រហែល៥០គ្រឿង សម្ភារៈយោធានិងយុទ្ធោបករណ៍ពិសេសជាង២០០គ្រឿង បុគ្គលិកយោធានិងបុគ្គលិកស៊ីវិលជាង ២០.០០០ នាក់ មកពីអង្គភាពចម្រុះ បានមកចូលរួមក្នុងសមយុទ្ធនេះ។