​អាហ្វហ្គានីស្ថាន៖ ជើងហោះហើរ​ក្នុងស្រុក​របស់​អា​ហ្វ​ហ្គា​នី​ស្ថាន ​ដែល​ត្រូវបាន​ផ្អាក​បន្ទាប់ពី​ការដណ្តើម​កាន់កាប់​ដោយ​ក្រុម​តា​លី​បង់​ បានចាប់ផ្តើម​ឡើងវិញ​កាលពី​ចុង​សប្តាហ៍​ ដោយ​ក្រុមហ៊ុន​អាកាសចរណ៍​អា​រី​យ៉ាណា​អា​ហ្វ​ហ្គា​នី​ស្ថាន​អ៊ែរ​ឡាញ ធ្វើ​ប្រតិបត្តិការ​រវាង​រដ្ឋធានី​កា​ប៊ុល និង​ខេត្ត​ចំនួន ៣។​

លោក Shershah Stor អ្នកគ្រប់គ្រង​ស្ថានីយ៍​អាកាសចរណ៍ ​នៅ​អាកាសយានដ្ឋាន​រដ្ឋធានី​កា​ប៊ុល​បាន​ប្រាប់​សារព័ត៌មាន AP ថា​ ជើងហោះហើរ​បានចាប់ផ្តើម​ឡើងវិញ​កាលពី​ថ្ងៃ​សៅរ៍ ​ទៅ​ភាគ​ខាងលិច​ទីក្រុង Herat, ភាគខាងត្បូងទីក្រុង Kandahar និង​ទីក្រុង Balkh ភាគ​ខាងជើង​។ លោក​បាន​និយាយថា​ ការធ្វើដំណើរ​ត្រូវបាន​ធ្វើឡើង​ដោយ​គ្មាន​ប្រព័ន្ធ​រ៉ា​ដា​ នៅ​អាកាសយានដ្ឋាន​រដ្ឋធានី​។ ​ក្រុមបច្ចេកទេស​កាតា​ និង​ទួរគី​បានមក​ដល់​រដ្ឋធានី​កា​ប៊ុល​កាលពី​សប្តាហ៍​មុន ដើម្បី​ជួយ​ដំណើរការ​ប្រតិបត្តិការ​ឡើង​វិញ​ នៅ​ព្រលានយន្តហោះ​ដែល​អង្គការសហប្រជាជាតិ​និយាយថា ​មាន​សារៈសំខាន់​ខ្លាំងណាស់ ក្នុងការ​ផ្តល់ជំនួយ​ម​នុស្ស​ធម៌​ដល់​ប្រទេស​នេះ​។

ទោះយ៉ាងណា​ក៏ដោយ​វា​នៅតែ​ត្រូវបាន​គេ​មើលថា តើ​ក្រុមហ៊ុន​អាកាសចរណ៍​ពាណិជ្ជកម្ម​ណាមួយ​ នឹងមាន​ឆន្ទៈ​ក្នុង​ការផ្តល់​សេវាកម្ម ​ឬ​យ៉ាងណា​៕

អត្ថបទ៖ សុខមាន