អាជ្ញាធរបានប្រាប់ឲ្យដឹងថា យ៉ាងហោចណាស់មានអ្នកស្លាប់ចំនួន ២នាក់ បន្ទាប់ពីមានភ្លៀងធ្លាក់យ៉ាងខ្លាំង នៅក្នុងរដ្ឋធានី Delhi របស់ប្រទេសឥណ្ឌា ដែលនាំឲ្យមានទឹកជន់លិចផ្លូវនានា ហើយសាលារៀនត្រូវបានបញ្ជាឲ្យបិទ នៅថ្ងៃព្រហស្បតិ៍ (ទី១ ខែសីហា) នេះ បន្ទាប់ពីមានការព្យាករណ៍ថា នឹងមានភ្លៀងធ្លាក់បន្ថែមទៀត។

អ្នកស្រុកបានភ្ញាក់ផ្អើលដោយសារសារភ្លៀងធ្លាក់ខ្លាំងភ្លាមៗមួយរំពេច កាលពីល្ងាចថ្ងៃពុធ (ទី៣១ ខែកក្កដា) ដោយទឹកភ្លៀងសរុបមានកម្រិត ១៤៧មីលីម៉ែត្រ ដែលត្រូវបានកត់ត្រាពេញមួយថ្ងៃ នៅភាគខាងកើតនៃទីក្រុង Delhi និងតំបន់ជាយក្រុងរបស់រដ្ឋធានីនេះ ដោយនាយកដ្ឋានឧតុនិយមគ្រប់គ្រងដោយរដ្ឋរបស់ឥណ្ឌា (IMD)។

ការិយាល័យឧតុនិយម បានឲ្យដឹងថា សំណុំពពកបាន «បានផ្ដុំនៅលើរដ្ឋធានី Delhi នៅគ្រប់តំបន់ទាំង៤» ហើយបានណែនាំប្រជាជនឲ្យប្រុងប្រយ័ត្នពេលធ្វើដំណើរ ដោយសារការមើលឃើញមិនសូវច្បាស់ល្អ និងទឹកជំនន់ នៅតំបន់ទំនាប។

IMD រំពឹងថា នឹងមានភ្លៀងធ្លាក់ក្នុងកម្រិតមធ្យមអមដោយផ្គររន្ទះ ពេញមួយថ្ងៃ ហើយបានព្យាករថា នឹងមានភ្លៀងធ្លាក់ក្នុងរយៈពេល ៥ថ្ងៃបន្ទាប់នៅក្នុងទីក្រុងនេះ៕