ប្រទេសម៉ុលដាវី នៅថ្ងៃព្រហស្បតិ៍ (ទី១ ខែកក្កដា) នេះ បានប្រាប់ឲ្យដឹងថា ខ្លួនបានប្រាប់អ្នកការទូតរុស្ស៊ីម្នាក់ឲ្យចាកចេញពីប្រទេស ហើយបានកោះអញ្ជើញឯកអគ្គរដ្ឋទូតរុស្ស៊ី ដើម្បីចេញការតវ៉ាជាផ្លូវការមួយ បន្ទាប់ពីមានការឃុំខ្លួនមន្ត្រី ២រូបពីបទក្បត់ជាតិ និងការសមគំនិត នៅដើមសប្តាហ៍នេះ។

ប្រភពពីអង្គភាពសន្តិសុខជាតិម៉ុលដាវី បានប្រាប់សារព័ត៌មាន Reuters ថា បុគ្គល ២រូប ត្រូវបានឃុំខ្លួនពីបទសង្ស័យផ្តល់ព័ត៌មានដល់អនុព័ន្ធការពារជាតិរបស់ស្ថានទូតរុស្ស៊ី។

ក្រសួងការបរទេសបានឲ្យដឹងនៅក្នុងសេចក្តីថ្លែងការណ៍មួយថា៖ «ព័ត៌មាន និងភស្តុតាង ត្រូវបានផ្ដល់ឲ្យ ដែលបញ្ជាក់ពីការប្រព្រឹត្តនៅលើទឹកដីនៃសាធារណរដ្ឋម៉ុលដាវី (ដោយអ្នកការទូតរុស្ស៊ី) នៃសកម្មភាពមិនស្របទៅនឹងលក្ខខណ្ឌការទូតរបស់ពួកគេ»។

ឯកអគ្គរដ្ឋទូតរុស្ស៊ីប្រចាំនៅទីក្រុងជីស៊ីណូ (Chisinau) លោក Oleg Vasnetsov បានប្រាប់អ្នកសារព័ត៌មានថា ទីក្រុងមូស្គូបានចាត់ទុកការបញ្ជាឲ្យអ្នកការទូតរបស់ខ្លួនចាកចេញនេះថា ជា «អរិភាប» ហើយថា រុស្ស៊ីនឹងឆ្លើយតបទៅនឹងចំណាត់ការរបស់ម៉ុលដាវី នាថ្ងៃព្រហស្បតិ៍នេះ។

ទីក្រុងមូស្គូបានរិះគន់ការប្រកាសពីករណីក្បត់ជាតិ និងការសមគំនិតថ្មី ដែលធ្វើឡើងដោយម៉ុលដាវី កាលពីថ្ងៃពុធ (ទី៣១ ខែកក្កដា) ដោយពណ៌នាថា នេះជា «ការបង្ហាញឲ្យឃើញយ៉ាងច្បាស់មួយផ្សេងទៀតនៃគំនិតប្រឆាំងរុស្ស៊ីដែលត្រូវបានធ្វើឲ្យធំធាត់ឡើងដោយសិប្បនិម្មិត នៅក្នុងប្រទេសម៉ុលដាវី»៕