ដោយស្រែកពាក្យស្លោក និងគ្រវីទង់ជាតិ ប្រជាជនអ៊ីស្រាអែល រាប់រយនាក់បានចេញធ្វើបាតុកម្មក្នុងទីក្រុង Tel Aviv ដើម្បីទាមទារឱ្យមានវិលការត្រឡប់មកវិញនៃចំណាប់ថ្នូរ ដែលត្រូវបានឃុំខ្លួននៅហ្កាហ្សា ខណៈពួកគេបានស៊ូទ្រាំទៅនឹងការចាប់ឃុំខ្លួនរយៈពេល៣០០ថ្ងៃ កាលពីថ្ងៃព្រហស្បតិ៍ ទី១ ខែសីហា។

អ្នកឆ្លើយឆ្លងព័ត៌មាន AFP បានរាយការណ៍ថា ក្រុមបាតុករបានស្រែកថា «គ្មានជ័យជម្នះទេ លុះត្រាតែចំណាប់ថ្នូរវិលត្រឡប់មកវិញ» ដែលក្រុមបាតុករភាគច្រើនពាក់អាវយឺត មានសរសេរថា «៣០០ថ្ងៃ» នៅជិតក្រសួងការពារជាតិ ក្នុងមជ្ឈមណ្ឌលពាណិជ្ជកម្មរបស់ប្រទេស។

ក្រុមយុទ្ធនាការចំណាប់ថ្នូរ និងវេទិកាគ្រួសារអ្នកបាត់ខ្លួន បាននិយាយនៅក្នុងសេចក្តីថ្លែងការណ៍មួយ មុនពេលប្រមូលផ្តុំគ្នាថា «ខណៈយើងឈរនៅទីនេះ ថ្ងៃនេះ មនុស្សរាប់សិបនាក់នៅតែជាប់ឃុំឃាំងដោយស៊ូទ្រាំទៅនឹងការឈឺចាប់ដែលមិនអាចនឹកស្មានដល់»។

វេទិកានេះ បានអំពាវនាវឱ្យរដ្ឋាភិបាលស្តាំនិយមរបស់នាយករដ្ឋមន្ត្រី លោក Benjamin Netanyahu ចុះហត្ថលេខាលើកិច្ចព្រមព្រៀងបទឈប់បាញ់ ដែលនឹងនាំយកចំណាប់ថ្នូរត្រឡប់មកលំនៅឋានវិញ។ កិច្ចព្រមព្រៀងនេះ បង្ហាញផ្លូវដែលអាចសម្រេចបានតែមួយគត់ដើម្បីធានាបានការដោះលែងចំណាប់ថ្នូរ បញ្ចប់ជម្លោះនាពេលបច្ចុប្បន្ន និងផ្តួចផ្តើមដំណើរការកសាងឡើងវិញនៅក្នុងតំបន់។

ទន្ទឹមនឹងនេះ សមាជិកគ្រួសារចំណាប់ថ្នូរ និងក្រុមបាតុករ បានប្រមូលផ្តុំគ្នានៅទីក្រុង Tel Aviv ដើម្បីប្រារព្ធខួប៣០០ថ្ងៃចាប់តាំងពីការវាយប្រហារថ្ងៃទី៧ ខែតុលា ទៅលើអ៊ីស្រាអែលភាគខាងត្បូង ដែលបានបង្កឱ្យមានសង្រ្គាមនៅក្នុងតំបន់ហ៊ុមព័ទ្ធប៉ាឡេស្ទីន។ ក្រុមបាតុករ បានបង្កើតស្លាកសញ្ញាដុតភ្លើងលេខ «៣០០» និងបង្ហោះគោម ទៅលើអាកាស។

ប្រទេសកាតា អេហ្ស៊ីប និងសហរដ្ឋអាមេរិក បានព្យាយាមម្តងហើយម្តងទៀតដើម្បីទទួលបានបទឈប់បាញ់ រវាងអ៊ីស្រាអែល និងក្រុមអ៊ីស្លាមនិយមហាម៉ាសប៉ាឡេស្ទីន នៅតំបន់ហ្កាហ្សា ជាកន្លែងដែលកងកម្លាំងអ៊ីស្រាអែល បានសម្លាប់ពលរដ្ឋប៉ាឡេស្ទីនជាង ៣៩.០០០នាក់ ចាប់តាំងពីក្រុមសកម្មប្រយុទ្ធដឹកនាំដោយហាម៉ាស បានវាយប្រហារអ៊ីស្រាអែលកាលពីខែតុលា ដោយបានសម្លាប់មនុស្ស ១.២០០នាក់ និងចាប់ជាចំណាប់ថ្នូរ២៥០នាក់។