​បាល់ទាត់៖ ​ការប្រកួត​រវាង​ម្ចាស់ផ្ទះ​ប្រេ​ស៊ី​ល​ និង​អា​ហ្ស​ង់​ទីន​វគ្គ​ជំ​រុះ World Cup ២០២២ ត្រូវ​បាន​ផ្អាក​ក្រោយ​លេង​បាន​ត្រឹម ៥​នាទី​ប៉ុណ្ណោះ បន្ទាប់ពី​អាជ្ញាធរ​សុខាភិបាល​ប្រេ​ស៊ី​ល​ឱ្យ​ដំណឹង​ថា កីឡាករ​អា​ហ្ស​ង់​ទីន​ ៣​រូប​បំពាន​វិធានការ​សុខាភិបាល​របស់​ប្រេ​ស៊ី​ល​។

​​ក្រុម​ភ្ញៀវ​អា​ហ្ស​ង់​ទីន​បាន​ដើរ​ចេញពី​ទីលាន​កីឡដ្ឋាន Corinthian Arena ក្រោយ​ការប្រកួត​ត្រូវ​បាន​ផ្អាក​។ ​​រឿង​ដ៏​ចម្រូងចម្រាស​នេះ​កើតឡើង នៅពេល​អាជ្ញាធរ​សុខ​ភិ​បាល​ប្រេ​ស៊ី​ល​ថា កីឡាករ​អា​ហ្ស​ង់​ទីន ៤នាក់​ដែល​មកពី​ចក្រភព​អង់គ្លេស​ត្រូវ​ធ្វើ​ច​ត្តា​ឡី​ស័ក​ជា​កំហិត​។ ​​មិនមាន​ការបញ្ចេញ​ឈ្មោះ​កីឡាករ​អា​ហ្ស​ង់​ទីន​ទាំង ៤រូបនោះ​ទេ​តែ​ច្បាស់​ណាស់​ថា ​ជា​កីឡាករ Emiliano Buendia និង Emiliano Martinez ដែល​មកពី Aston Villa, Giovanni lo Celso និង Cristian Romero មកពី Tottenham Hotspur​។​

​​Martinez, Lo Celso និង Romero គឺជា​ជំរើស​ដំបូង​ក្នុងការ​ប្រកួត​ទល់នឹង​ប្រេ​ស៊ី​ល​នេះ​។​ ​មិន​មាន​ការបញ្ជាក់​ពី​កាលបរិច្ឆេទ​ប្រកួត​ឡើងវិញ​រវាង​ក្រុម​ទាំងពីរ​ឡើយ ខណៈ​អា​ហ្ស​ង់​ទីន​ក៏​បាន​​ចាកចេញ ​ដើម្បី​ត្រៀមលក្ខណៈ​សម្រាប់​ការប្រកួត​ជំ​រុះ​បន្ទាប់​របស់​ខ្លួន​ដែរ ​ដោយ​នឹង​ត្រូវ​ជួប​ជាមួយ​បូ​លី​វៀ​នៅ​ថ្ងៃ​សុក្រ​ ទី​១០ ខែ​កញ្ញា​នេះ​៕

​អត្ថបទ​៖​នាង សុភា​វុ​ធ