គូប្រជែងរបស់ប្រធានាធិបតីវេណេស៊ុយអេឡា លោក Nicolas Maduro និងបេក្ខជនគណបក្សប្រឆាំង លោក Edmundo Gonzalez កាលពីថ្ងៃព្រហស្បតិ៍ (ទី១ ខែសីហា) ត្រូវបានសហរដ្ឋអាមេរិកទទួលស្គាល់ថា ជាអ្នកឈ្នះការបោះឆ្នោតដ៏ចម្រូងចម្រាសរបស់ប្រទេសវេណេស៊ុយអេឡា ដោយបានច្រានចោលការអះអាងនូវជ័យជម្នះរបស់លោក Maduro។

តាមរយៈសេចក្តីថ្លែងការណ៍មួយ កាលពីថ្ងៃព្រហស្បតិ៍ រដ្ឋមន្ត្រីការបរទេសអាមេរិក លោក Antony Blinken បានប្រាប់ឲ្យដឹងថា៖ «ដោយមានភស្តុតាងយ៉ាងច្រើនលើសលប់ វាច្បាស់ណាស់សម្រាប់សហរដ្ឋអាមេរិក និងសំខាន់បំផុតនោះ សម្រាប់ប្រជាជនវេណេស៊ុយអេឡា ដែលថា លោក Edmundo Gonzalez Urrutia ទទួលបានសំឡេងឆ្នោតច្រើនបំផុតជាងគេ ក្នុងការបោះឆ្នោតប្រធានាធិបតីថ្ងៃទី២៨ ខែកក្កដា របស់ប្រទេសវេណេស៊ុយអេឡា»។

ការប្រកាសពីទីក្រុងវ៉ាស៊ីនតោន មិនមានអ្វីលើសពីការអបអរសាទរចំពោះរូបលោក សម្រាប់ «យុទ្ធនាការដ៏ជោគជ័យ» ដែលជាការការឈានដល់ជំហានដ៏កៀកបំផុតរបស់សហរដ្ឋអាមេរិក គិតចាប់តាំងពីការបោះឆ្នោតដ៏ចម្រូងចម្រាស កាលពីថ្ងៃអាទិត្យ ដើម្បីទទួលស្គាល់លោក Gonzalez ជាមេដឹកនាំថ្មីរបស់ប្រទេសសមាជិករបស់ OPEC មួយនេះ។

គួរបញ្ជាក់ថា ជម្លោះជុំវិញលទ្ធផលបោះឆ្នោតប្រធានាធិបតី បានធ្វើឲ្យមានការតវ៉ាក្នុងប្រទេសវេណេស៊ុយអេឡា។ ក្រុមប្រឹក្សាបោះឆ្នោតរបស់វេណេស៊ុយអេឡា បានប្រកាសថា លោក Maduro ដែលកាន់អំណាចតាំងពីឆ្នាំ២០១៣ មកនោះ ជាអ្នកឈ្នះការបោះឆ្នោត កាលពីថ្ងៃទី២៨ ខែកក្កដា ដោយទទួលបានសំឡេងគាំទ្រ ៥១ភាគរយ។ តែក្រុមប្រឆាំងនិយាយថា សន្លឹកឆ្នោតសរុបប្រហែល ៩០ភាគរយ បង្ហាញថា លោក Gonzalez ទទួលបានការគាំទ្រច្រើនជាង ២ដងលើសលោក Maduro ដែលស្របតាមការស្ទង់មតិឯករាជ្យដែលបានធ្វើឡើងមុនការបោះឆ្នោត៕