​ហ្គី​ណេ៖ មានការ​អបអរសាទរ​នៅ​តាម​ដង​ផ្លូវ​នៃ​ទីក្រុង Conakry កាលពី​ថ្ងៃអាទិត្យ ​បន្ទាប់ពី​ជនជាតិ​ហ្គី​ណេ​មួយចំនួន​បាន​ដើរ​តាមផ្លូវ ​ដើម្បី​អបអរសាទរ​ដល់​ទាហាន​ដែល​បាន​ឃុំខ្លួន​ប្រធានាធិបតី Alpha Conde បន្ទាប់ពី​ការផ្ទុះអាវុធ​យ៉ាង​កក្រើក​ជាច្រើន​ម៉ោង​។​

​បន្ទាប់មក​ទាហាន​បះបោរ​នៅក្នុង​ប្រទេស​អាហ្វ្រិក​ខាងលិច​មួយ​នេះ បានប្រកាស​នៅលើ​កញ្ចក់​ទូរទស្សន៍​រដ្ឋ​ថា​ រដ្ឋាភិបាល​ត្រូវបាន​រំលាយ​នៅក្នុង​រដ្ឋប្រហារ​។​ ព្រំដែន​របស់​ប្រទេស​នេះ​ត្រូវបាន​បិទ ​ហើយ​រដ្ឋធម្មនុញ្ញ​របស់​ប្រទេស​នេះ​ត្រូវបាន​ប្រកាសថា​ អស់​សុពលភាព​នៅក្នុង​សេចក្តីប្រកាស​ដែល​បាន​អាន​លឺៗ នៅលើ​កញ្ចក់​ទូរទស្សន៍​រដ្ឋ​ដោយ​វរសេនីយ៍ឯក Mamadi Doumbouya ដែល​បាន​ប្រាប់​ប្រជាពលរដ្ឋ​ហ្គី​ណេ​ថា កាតព្វកិច្ច​របស់​ទាហាន​គឺ​ដើម្បី​ជួយសង្គ្រោះ​ប្រទេស។ ​ប្លុក​តំបន់​អាហ្វ្រិក​ខាងលិច​ដែល​ត្រូវបាន​គេ​ស្គាល់​ថា ECOWAS បាន​ថ្កោលទោស​ភ្លាមៗចំពោះ​ស្ថានភាព​នេះ ដោយ​គំរាម​ដាក់ទណ្ឌកម្ម​ប្រសិនបើ​មិន​ដោះលែង​លោក Conde ភ្លាមៗ នោះទេ​។

អគ្គលេខាធិការ​អង្គការសហប្រជាជាតិ លោក Antonio Guterres បាន​សរសេរ​លើ​បណ្តាញ​សង្គម Twitter ថា ​លោក​ថ្កោលទោស​យ៉ាងខ្លាំង​ “រាល់​ការដណ្ដើម​កាន់កាប់​រដ្ឋា​ភិ​បាល​ដោយ​កម្លាំង​នៃ​អា​វុ​ធ។​ ​វា​គឺជា​ការដើរថយក្រោយ​ស​ម្រា​ប់​ហ្គី​ណេ​ ដែល​មនុស្ស​ជាច្រើន​សង្ឃឹមថា ​ប្រទេស​នេះ​បានគេច​ផុតពី​ការគ្រប់គ្រង​ដោយ​អំណាច​យោធា៕

អត្ថបទ៖ សុខមាន