ជនជាតិរុស្ស៊ីដែលត្រូវបានដោះលែងក្នុងលក្ខខណ្ឌដោះដូរអ្នកទោសជាប្រវត្តិសាស្ត្រជាមួយលោកខាងលិចនោះ ត្រូវបានប្រធានាធិបតីរុស្ស៊ី លោក Vladimir Putin ផ្ដល់នូវការស្វាគមន៍ជាវីរៈបុរស កាលពីថ្ងៃព្រហស្បតិ៍ (ទី១ ខែសីហា) នៅពេលដែលពួកគេបានចុះពីលើយន្តហោះ នៅទីក្រុងមូស្គូ ដោយសន្យាផ្តល់រង្វាន់ថ្នាក់រដ្ឋ និងការសន្ទនាអំពីអនាគតរបស់ពួកគេ។

គួរបញ្ជាក់ថា មនុស្ស ៨នាក់ ត្រូវបានបញ្ជូនត្រឡប់ទៅកា់ប្រទេសរុស្ស៊ីវិញ ដែលជាផ្នែកមួយនៃការដោះដូរអ្នកទោសរបស់លោកខាងកើត-ខាងលិចដ៏ធំបំផុត គិតចាប់តាំងពីចុងបញ្ចប់នៃសង្រ្គាមត្រជាក់ ដោយក្នុងនោះរួមទាំងលោក Vadim Krasikov ជាឃាតករដែលត្រូវបានកាត់ទោសដោយតុលាការអាល្លឺម៉ង់ពីបទសម្លាប់អតីតសកម្មប្រយុទ្ធឆេឆេន (Chechen) នៅក្នុងឧទ្យានទីក្រុងប៊ែរឡាំង និងបុរស ២នាក់ទៀត ដែលត្រូវបានផ្ដន្ទាទោសពីបទឧក្រិដ្ឋកម្មតាមអ៊ីនធឺណិត នៅសហរដ្ឋអាមេរិក រួមជាមួយលោក Vladislav Klyushin និងលោក Roman Seleznyov។

លោក Putin អតីតមន្ត្រី KGB (ទីភ្នាក់ងាររដ្ឋាភិបាល) និងជាអតីតប្រធានសេវាសន្តិសុខ FSB (សេវាស៊ើបការសម្ងាត់) របស់រុស្ស៊ី បានជួបអ្នកត្រឡប់មកវិញទាំង ៨នាក់ នៅអាកាសយានដ្ឋានទីក្រុងមូស្គូ ហើយបានឱបពួកគេ ឬចាប់ដៃពួកគេ ដោយផ្តល់កម្រងផ្កាខ្លះដល់ពួកគេ នៅពេលអ្នកទាំងនោះចុះពីយន្តហោះ ហើយដើរនៅលើកម្រាលព្រំក្រហម អមដោយឆ្មាំកិត្តិយសរបស់វិមានក្រឹមឡាំង។

នៅខាងក្នុងអគារអាកាសយានដ្ឋាន លោក Putin ដែលមើលទៅពិតជាមានភាពរីករាយនោះ បានប្រាប់អ្នកត្រឡប់មកវិញថា៖ «ជាដំបូង ខ្ញុំសូមអបអរសាទរអ្នកទាំងអស់ ចំពោះការវិលត្រឡប់មកមាតុភូមិវិញ។ ឥឡូវនេះ ខ្ញុំចង់និយាយទៅកាន់អ្នកដែលមានទំនាក់ទំនងផ្ទាល់ទៅនឹងការបម្រើយោធា។ ខ្ញុំចង់អរគុណអ្នក ចំពោះភាពស្មោះត្រង់របស់អ្នកចំពោះពាក្យសម្បថរបស់អ្នក និងកាតព្វកិច្ចរបស់អ្នក ចំពោះមាតុភូមិរបស់អ្នក ដែលមិនភ្លេចអ្នកសូម្បីមួយវិនាទី»៕