ប្រធានកិច្ចការផ្ទៃក្នុងរបស់សហភាពអឺរ៉ុប (EU) កាលពីថ្ងៃព្រស្បតិ៍ (ទី១ ខែសីហា) បានព្រមានប្រទេសហុងគ្រីថា ការសម្រេចចិត្តរបស់ប្រទេសនេះ ក្នុងការបន្ធូរបន្ថយការរឹតបន្តឹងទិដ្ឋាការ សម្រាប់ជនជាតិរុស្ស៊ី និងបេឡារុស បានបង្កឲ្យមានគំរាមកំហែងសន្តិសុខនាពេលខាងមុខ ហើយបាននិយាយថា លោកស្រី នឹងចាត់វិធានការ ប្រសិនបើកង្វល់របស់ប្លុក មិនត្រូវបានដោះស្រាយនោះទេ។

គួរបញ្ជាក់ថា កាលពីខែមុន ហុងគ្រី បានពង្រីកកម្មវិធីអន្តោប្រវេសន៍ «អត្តសញ្ញាណប័ណ្ណជាតិ» របស់ខ្លួន ដើម្បីរួមបញ្ចូលជនជាតិរុស្ស៊ី និងបេឡារុស ក្នុងចំណោមអ្នកផ្សេងទៀត។ អ្នកកាន់អត្តសញ្ញាណប័ណ្ណបែបនេះ ត្រូវបានអនុញ្ញាតឲ្យធ្វើការនៅប្រទេសហុងគ្រី ដោយមិនចាំបាច់ត្រួតពិនិត្យប្រវត្តិរូប ហើយអាចនាំក្រុមគ្រួសាររបស់ពួកគេមកកាន់ប្រទេសនេះបាន។

ការសម្រេចនេះ បានបង្កការភ្ញាក់ផ្អើលក្នុងចំណោមមន្ត្រី EU ដែលបាននិយាយថា រុស្ស៊ី និងសម្ព័ន្ធមិត្តរបស់ខ្លួន គឺបេឡារុស អាចកេងចំណេញលើគម្រោងនេះ ដើម្បីបញ្ជូនពួកធ្វើអំពើវិឆ្ឆេតកម្ម និងចារកម្ម ចូលទៅក្នុងតំបន់ Schengen ដែលគ្មានព្រំដែនរបស់ EU ទោះបីជាប្លុកនេះ កំពុងព្យាយាមផ្តាច់ខ្លួនពីទីក្រុងមូស្គូ ជុំវិញសង្រ្គាម នៅអ៊ុយក្រែនក៏ដោយ។

ស្នងការទទួលបន្ទុកកិច្ចការផ្ទៃក្នុងសហភាពអឺរ៉ុប លោកស្រី Ylva Johansson បានឲ្យដឹងនៅក្នុងសារដែលបង្ហោះលើបណ្ដាញសង្គម X កាលពីល្ងាចថ្ងៃទី១ ខែសីហាថា៖ «ប្រទេសរុស្ស៊ី គឺជាអ្នកគំរាមកំហែងផ្នែកសន្តិសុខ។ យើងត្រូវការការប្រុងប្រយ័ត្នបន្ថែមទៀត ដោយមិនអាចធ្វេសប្រហែសបានឡើយ។ ថ្ងៃនេះនៅក្នុងលិខិតមួយ ខ្ញុំបានស្នើឲ្យរដ្ឋាភិបាលហុងគ្រីពន្យល់។ ប្រសិនបើគម្រោងងាយស្រួលចូលប្រទេសរបស់ពួកគេ មានហានិភ័យ យើងនឹងចាត់វិធានការតាមដែលអាចធ្វើទៅបាន»។

នាយករដ្ឋមន្ត្រីហុងគ្រី លោក Viktor Orban បានរក្សាទំនាក់ទំនងជិតស្និទ្ធជាមួយទីក្រុងមូស្គូ និងបានទៅជួបប្រធានាធិបតីរុស្ស៊ី លោក Vladimir Putin កាលពីខែមុន ជាផ្នែកមួយនៃការការកំណត់ដោយខ្លួនឯងថា ជា «បេសកកម្មសន្តិភាព» ដែលធ្វើឡើងដោយគ្មានការគាំទ្រពី EU នោះឡើយ ដោយដំណើរនោះបានកកើតឡើងប៉ុន្មានថ្ងៃបន្ទាប់ពីចូលកាន់តំណែងជាប្រធានាធិបតីប្តូរវេនរបស់ប្លុកនេះ៕