ទឹកជំនន់ដែលបានកើតឡើងដោយសារភ្លៀងធ្លាក់ខ្លាំង នៅក្នុងប្រទេសប៉ាគីស្ថាន បានបង្កជាការខូចខាត និងបណ្ដាលឲ្យមនុស្សយ៉ាងហោចណាស់ ៣០នាក់ស្លាប់ ក្នុងសប្តាហ៍នេះ ខណៈដែលទីក្រុងធំជាងគេបំផុតទី២ Lahore បានឃើញទឹកល្ហល្ហាចគ្រប់ទីកន្លែង ដោយសារតែកម្រិតទឹកភ្លៀងច្រើនបំផុតដែលទីក្រុងនេះជួបប្រទះជាលើកដំបូង ក្នុងរយៈពេលជាង ៤ទសវត្សរ៍។

គួរបញ្ជាក់ថា ការមកដល់នៃរដូវខ្យល់មូសុង បានបង្កឲ្យមានទឹកជំនន់ និងបំណាក់ដី នៅទូទាំងតំបន់អាស៊ីខាងត្បូង ក្នុងសប្តាហ៍កន្លងមក ដោយយ៉ាងហោចណាស់មនុស្ស ១៩៥នាក់បានបាត់បង់ជីវិត និងជិត ២០០នាក់ បាត់ខ្លួន ក្នុងគ្រោះមហន្តរាយមួយ នៅប្រទេសជិតខាងឥណ្ឌា។

ទឹកភ្លៀងបានធ្លាក់យ៉ាងជោកជាំនៅភាគខាងជើងនៃប្រទេសប៉ាគីស្ថាន ដោយបានបណ្តាលឲ្យមានទឹកជំនន់ និងអាគារដួលរលំ ព្រមទាំងបង្កើននូវហានិភ័យនៃការឆក់ចរន្តអគ្គិសនី។

ក្នុងខេត្តភាគឦសាន Punjab ជាកន្លែងដែលអាជ្ញាធរបានសរុបចំនួនអ្នកស្លាប់ ៦នាក់ មន្ត្រីសេវាសាធារណៈប្រចាំខេត្ត បាននិយាយថា៖ «ការបំបែកកំណត់ត្រាទឹកភ្លៀងរយៈពេល ៤៤ឆ្នាំ បានកើតមានម្ដងទៀត នៅក្នុងទីក្រុង Lahore»។ ហើយជាមួយគ្នានេះ លោកបានព្រមានថា ទឹកជំនន់យ៉ាងគំហុកភ្លាមៗ ត្រូវបានរំពឹងថា នឹងកើតឡើងនៅភាគខាងត្បូង ក្នុងសប្តាហ៍នេះ។

អង្គការសកល ដូចជាអង្គការសហប្រជាជាតិជាដើម មើលឃើញប៉ាគីស្ថានជាប្រទេសមួយ ក្នុងចំណោមប្រទេសដែលងាយរងគ្រោះបំផុត ចំពោះអាកាសធាតុធ្ងន់ធ្ងរ និងបម្រែបម្រួលអាកាសធាតុ ដោយទឹកជំនន់ឆ្នាំ២០២២ បានបង្កជាការបំផ្លិចបំផ្លាញយ៉ាងធ្ងន់ធ្ងរ ដែលបានសម្លាប់មនុស្សជាង ១.៧០០នាក់ និងរាប់លាននាក់ត្រូវផ្លាស់ចេញពីលំនៅឋាន៕