ទិន្នន័យរបស់រដ្ឋាភិបាល នៅថ្ងៃសុក្រ (ទី២ ខែសីហា) នេះ បានបង្ហាញថា ចំនួនអ្នកជំងឺដែលសម្រាកព្យាបាលនៅមន្ទីរពេទ្យ ក្នុងប្រទេសកូរ៉េខាងត្បូង បន្ទាប់ពីបានធ្វើរោគវិនិច្ឆ័យថា មានជំងឺកូវីដ-១៩ បានកើនឡើង ៥ដង ក្នុងរយៈពេល ៣សប្តាហ៍ ដល់ចុងខែកក្កដា។

យោងតាមទីភ្នាក់ងារគ្រប់គ្រង និងបង្ការជំងឺកូរ៉េ បានឲ្យដឹងថា ចំនួនអ្នកជំងឺក្នុងមន្ទីរពេទ្យដែលត្រូវបានធ្វើរោគវិនិច្ឆ័យថា មានជំងឺកូវីដ-១៩ ក្នុងសប្តាហ៍ទី៤ នៃខែកក្កដា បានកើនឡើងដល់ ៤៦៥នាក់ ពោលគឺមានកម្រិតជាង ៥ដងពីសប្តាហ៍ដំបូងនៃខែនេះ ដែលមានចំនួន ៩១នាក់។

ជាមួយគ្នានេះ ទិន្នន័យបានបង្ហាញថា ក្នុងរយៈពេល ៤សប្តាហ៍ដំបូងនៃខែកក្កដា អ្នកជំងឺ ៩២៩នាក់ បានសម្រាកព្យាបាលនៅមន្ទីរពេទ្យ ដោយសារមានការឆ្លងយ៉ាងខ្លាំងនូវជំងឺដែលប៉ះពាល់ដល់ប្រព័ន្ធផ្លូវដង្ហើមរបស់មនុស្សនេះ។

មន្ត្រីជាន់ខ្ពស់នៃទីភ្នាក់ងារគ្រប់គ្រង និងបង្ការជំងឺកូរ៉េ កាលពីថ្ងៃព្រហស្បតិ៍ (ទី១ ខែសីហា) បាននិយាយថា ប្រទេសកូរ៉េខាងត្បូងនឹងចាប់ផ្ដើមការចាក់វ៉ាក់សាំងបង្កាជំងឺកូវីដ-១៩ ឡើងវិញ សម្រាប់អ្នកដែលមានវ័យចាប់ពី ៦៥ឆ្នាំឡើងទៅ ក្នុងខែតុលា។

គួរបញ្ជាក់ថា កូរ៉េខាងត្បូងបានប្ដូរស្ថានភាពប្រទេសពីជំងឺរាតត្បាតទៅជាជំងឺឆ្លងធម្មតា នៅក្នុងខែឧសភា ឆ្នាំ២០២៣ ដោយបានលុបចោលកាតព្វកិច្ចពាក់ម៉ាស់នៅក្នុងកន្លែងភាគច្រើន បន្ទាប់ពីមានដាក់រដ្ឋក្នុងគ្រាអាសន្នអស់រយៈពេលជាង ៣ឆ្នាំ។

គួរជ្រាបដែរថា ជំងឺកូវីដ-១៩ បានឆក់យកជីវិតមនុស្ស ៣៥.៩៣៤នាក់ នៅក្នុងប្រទេសនេះ គិតចាប់ពីខែមករា ឆ្នាំ២០២០ ដល់ខែសីហា ឆ្នាំ២០២៣ ខណៈដែលមនុស្សជាង ៣៤,៥លាននាក់ បានឆ្លងជំងឺនេះ ក្នុងអំឡុងពេលដូចគ្នា នៅក្នុងប្រទេសដែលមានប្រជាជនប្រហែល ៥១លាននាក់នេះ៕