មន្ទីរបញ្ចកោណ បាននិយាយកាលពីថ្ងៃសុក្រ ទី២ ខែសីហា ថា យោធាសហរដ្ឋអាមេរិក នឹងដាក់ពង្រាយយន្តហោះចម្បាំងនិងនាវាចម្បាំងរបស់កងទ័ពជើងទឹកបន្ថែមទៀតទៅកាន់តំបន់មជ្ឈិមបូព៌ា ខណៈទីក្រុងវ៉ាស៊ីនតោន ព្យាយាមពង្រឹងការការពារ បន្ទាប់ពីការគំរាមកំហែងពីសំណាក់ប្រទេសអ៊ីរ៉ង់ និងសម្ព័ន្ធមិត្តរបស់ខ្លួន មានក្រុមហាម៉ាស និងក្រុមហេសបូឡា។

សហរដ្ឋអាមេរិក កំពុងត្រៀមទប់ទល់ជាមួយប្រទេសអ៊ីរ៉ង់ ដែលប្រទេសនេះបានប្តេជ្ញាចិត្តក្នុងការឆ្លើយតបចំពោះការសម្លាប់មេដឹកនាំក្រុមហាម៉ាស លោក Ismail Haniyeh ក្នុងទីក្រុងតេអេរ៉ង់ ជាការសម្លាប់មន្ត្រីជាន់ខ្ពស់ច្រើននាក់ជាបន្តបន្ទាប់ នៅក្នុងក្រុមសកម្មប្រយុទ្ធប៉ាឡេស្ទីន ខណៈសង្រ្គាមរវាងអ៊ីស្រាអែលនិងក្រុមហាម៉ាសនៅតំបន់ហ្កាហ្សារាលដាល។

រដ្ឋមន្ត្រីការពារជាតិអាមេរិក លោក Lloyd Austin បានព្រមព្រៀងបញ្ជូននាវាចម្បាំង និងនាវាពិឃាតបន្ថែមទៀតរបស់កងទ័ពជើងទឹក ដែលអាចបាញ់ទម្លាក់មីស៊ីលបាលីស្ទីកទៅកាន់មជ្ឈិមបូព៌ា និងអឺរ៉ុប។

ប្រទេសនេះ ក៏កំពុងបញ្ជូនកងយន្តហោះចម្បាំងបន្ថែមមួយក្រុម ទៅកាន់តំបន់មជ្ឈិមបូព៌ាផងដែរ។

មន្ទីរបញ្ចកោណបាននិយាយនៅក្នុងសេចក្តីថ្លែងការណ៍ថា លោក Austin បានបញ្ជាឱ្យមានការកែសម្រួលឥរិយាបថយោធាអាមេរិកដែលត្រូវបានរៀបចំដើម្បីធ្វើឲ្យប្រសើរការការពារកងកម្លាំងរបស់សហរដ្ឋអាមេរិក និងបង្កើនការគាំទ្រសម្រាប់ការការពារអ៊ីស្រាអែល និងដើម្បីធានាបានថា សហរដ្ឋអាមេរិក បានត្រៀមខ្លួនដើម្បីឆ្លើយតបទៅនឹងឧបទ្ទវហេតុផ្សេងៗទៀត។