លោក Donald Trump ដែលជាបេក្ខជនតំណែងប្រធានាធិបតីរបស់គណបក្សសាធារណរដ្ឋ បានយល់ព្រមជាមួយនឹងការស្នើពីប្រព័ន្ធផ្សព្វផ្សាយ Fox News ដែលចង់រៀបចំការជជែកដេញដោលជាមួយអនុប្រធានាធិបតីអាមេរិក លោកស្រី Kamala Harris របស់គណបក្សប្រជាធិបតេយ្យ នៅថ្ងៃទី៤ ខែកញ្ញា ដោយការព្រមព្រៀងនេះ ត្រូវបានលោកបង្ហោះនៅលើបណ្ដាញសង្គម Truth Social កាលពីល្ងាចថ្ងៃសុក្រ (ទី២ ខែសីហា)។

ដោយសំដៅទៅលើប្រធានាធិបតី លោក Joe Biden ដែលបានបញ្ចប់ការប៉ុនប៉ងស្វែងរកការជាប់ឆ្នោតឡើងវិញ បន្ទាប់ពីបានឡើងជជែកដេញដោលជាមួយខ្លួននោះ លោក Trump បាននិយាយថា៖ «លក្ខន្តិកនានា នឹងដូចទៅនឹងលក្ខន្តិកនៃការជជែកដេញដោលរបស់ខ្ញុំជាមួយ Sleepy Joe (លោក Joe ដែលងងុយដេក) ដែលត្រូវបានគណបក្សរបស់លោកធ្វើទង្វើដាក់យ៉ាងហួសហេតុ នៅចំពោះមុខទស្សនិកជនពេញឆាក»។

ការបង្ហោះនោះត្រូវបានលុបចេញ ២-៣នាទី មុននឹងត្រូវបានបង្ហោះឡើងវិញ ដោយលោក Trump បានលុបសំណើរបស់លោក ដើម្បីឲ្យមានការជួបជុំ នៅសាលាក្រុង «ធំ» សម្រាប់កាលបរិច្ឆេទដូចគ្នានោះ ប្រសិនបើលោកស្រី Harris «មិនព្រម ឬមិនអាចទៅជជែកដេញដោលគ្នាបាន»។ កាលពីខែមុន លោកស្រី Harris បានឆ្លើយតបថា លោកស្រី «ត្រៀមរួចហើយ» បន្ទាប់ពីប្រព័ន្ធផ្សព្វផ្សាយ Fox News បានស្នើឲ្យមានការជជែកដេញដោលប្រធានាធិបតី រវាងបេក្ខជនទាំង២ នៅថ្ងៃទី១៧ ខែកញ្ញា។

គួរបញ្ជាក់ថា នៅមុននេះ បន្ទាប់ពីលោក Biden បានដកខ្លួនចេញពីការប្រកួតប្រជែង កាលពីថ្ងៃទី២១ ខែកក្កដា ហើយបានគាំទ្រលោកស្រី Harris ឲ្យបន្តយុទ្ធនាការ លោក Trump បាននិយាយថា លោកនឹងមិនជជែកដេញដោលជាមួយលោកស្រីទេ ព្រោះលោកស្រីមិនទាន់ក្លាយជាបេក្ខជនផ្លូវការ៕