ប្រព័ន្ធផ្សព្វផ្សាយរដ្ឋ នៅថ្ងៃសៅរ៍ (ទី៣ ខែសីហា) បានរាយការណ៍ថា មេដឹកនាំកូរ៉េខាងជើង លោក គីម ជុងអ៊ុន (Kim Jong Un) បានចោទប្រកាន់ប្រព័ន្ធផ្សព្វផ្សាយរបស់កូរ៉េខាងត្បូងថា បានផ្សព្វផ្សាយពាក្យចចាមអារ៉ាម អំពីការខូចខាត ហើយនិងចំនួនអ្នករបួស និងអ្នកបាត់បង់ជីវិត ដោយសារទឹកជំនន់ នៅក្នុងប្រទេសរបស់លោក ដោយការលើកឡើងនេះមានរយៈពេលមួយថ្ងៃបន្ទាប់ពីទីក្រុងសេអ៊ូល បានព្យាយាមស្នើផ្តល់ជំនួយមនុស្សធម៌។

គួរបញ្ជាក់ថា កូរ៉េខាងជើងបានឲ្យដឹងនៅដើមសប្តាហ៍នេះថា មានអ្នកស្លាប់ និងរបួសមិនជាក់លាក់ ដែលបណ្តាលមកពីទឹកជំនន់នៅតំបន់ភាគខាងជើងរបស់ប្រទេស ដោយបន្ថែមពីលើការខូចខាតផ្ទះសម្បែងរាប់ពាន់ខ្នង។

ទីក្រុងសេអ៊ូល កាលពីថ្ងៃទី១ ខែសីហា បានប្រាប់ថា ខ្លួនមានឆន្ទៈ «ផ្តល់ជាបន្ទាន់» នូវជំនួយមនុស្សធម៌ដល់ «ជនរងគ្រោះដោយគ្រោះមហន្តរាយរបស់កូរ៉េខាងជើង» បន្ទាប់ពីរបាយការណ៍ព័ត៌មានរបស់កូរ៉េខាងត្បូង បានឲ្យដឹងថា ចំនួនអ្នកស្លាប់ និងបាត់ខ្លួន អាចឡើងដល់ ១.៥០០នាក់។ របាយការណ៍របស់ទូរទស្សន៍ Chosun ដែលក្រោយមក ត្រូវបានលើកឡើងដោយប្រព័ន្ធផ្សព្វផ្សាយផ្សេងទៀត ក៏បានសំដៅទៅលើការស្លាប់ ដែលអាចកើតមានរបស់បុគ្គលិកជួយសង្គ្រោះ ក្នុងការធ្លាក់ឧទ្ធម្ភាគចក្រផងដែរ។

ប៉ុន្តែបើយោងតាមទីភ្នាក់ងារសារព័ត៌មានមជ្ឈិមកូរ៉េរបស់ទីក្រុងព្យុងយ៉ាង បានឲ្យដឹងថា លោក គីម បានរិះគន់របាយការណ៍នេះថា ជាការ «ផ្សព្វផ្សាយពាក្យចចាមអារ៉ាមមិនពិតដែលថា ការបាត់បង់អាយុជីវិតមនុស្ស ត្រូវបានរំពឹងថា នឹងមានលើសពី ១.០០០ ឬ ១.៥០០នាក់។

ទីភ្នាក់ងារសារព័ត៌មាន KCNA នៅថ្ងៃទី៣ ខែសីហា បានរាយការណ៍ថា មេដឹកនាំកូរ៉េខាងជើង «បានថ្កោលទោសយ៉ាងខ្លាំងក្លា ចំពោះទម្លាប់កែមិនបាន និងចរិតធម្មជាតិដ៏គួរឲ្យស្អប់ខ្ពើមរបស់កូរ៉េខាងត្បូង»។ តាមរយៈសារព័ត៌មានដដែលនោះ លោក គីម បានបន្ថែមថា របាយការណ៍ទឹកជំនន់នេះ បានបង្កើតជា «យុទ្ធនាការលាបពណ៌របស់កូរ៉េខាងត្បូង ដើម្បីនាំមកនូវភាពអាម៉ាស់ និងធ្វើឲ្យខូចមុខមាត់ដល់ប្រទេសរបស់យើង»៕