ការអំពាវនាវជាបន្ទាន់សម្រាប់ជនបរទេសឱ្យចាកចេញពីប្រទេសលីបង់បានកើនឡើងកាលពីថ្ងៃអាទិត្យ ទី ៤ សីហា ដោយប្រទេសបារាំងបានព្រមានអំពីស្ថានភាព "ប្រែប្រួលខ្លាំង" ខណៈអ៊ីរ៉ង់ និងសម្ព័ន្ធមិត្តបានត្រៀមខ្លួនជាស្រេចសម្រាប់ការឆ្លើយតបចំពោះការសម្លាប់មេដឹកនាំជាន់ខ្ពស់ ដែលបានស្ដីបន្ទោសលើអ៊ីស្រាអែល និងការស្លាប់មេបញ្ជាការជាន់ខ្ពស់ក្រុមហេសបូឡា ដែលអ៊ីស្រាអែលបានប្រកាស។

ខណៈក្រុមអ្នកការទូតធ្វើការដើម្បីបញ្ចៀសការបំផ្លិចបំផ្លាញដ៏គួរឱ្យព្រួយបារម្ភនោះ ប្រធានាធិបតីបារាំងលោក Emmanuel Macron និងមហាក្សត្រហ្ស៊កដានី Abdullah II បាននិយាយថា ការកើនឡើងផ្នែកយោធាក្នុងតំបន់ត្រូវតែជៀសវាងឲ្យបានរាល់ការខូចខាតទាំងអស់ ។

ប្រទេសជាច្រើនរួមទាំងសហរដ្ឋអាមេរិក ចក្រភពអង់គ្លេស ស៊ុយអែត និងហ្ស៊កដានី បានណែនាំពលរដ្ឋរបស់ពួកគេឱ្យចាកចេញពីប្រទេសលីបង់ ស្របពេលមានភាពតានតឹងកាន់តែខ្លាំងរវាងអ៊ីស្រាអែល និងក្រុមហេសបូឡា ដែលមានមូលដ្ឋាននៅលីបង់។

ទន្ទឹមនឹងមានការរំពឹងថានឹងមានសកម្មភាពយោធាដ៏សំខាន់ពីចលនាហេសបូឡារបស់ប្រទេសលីបង់ គាំទ្រដោយអ៊ីរ៉ង់ រដ្ឋមន្ត្រីការពារជាតិអ៊ីស្រាអែល លោក Yoav Gallant បាននិយាយថា "ប្រសិនបើពួកគេហ៊ានវាយប្រហារមកលើយើង ពួកគេនឹងត្រូវខាតបង់យ៉ាងធ្ងន់ធ្ងរ"។

សង្គ្រាមជិត១០ខែនៅហ្កាហ្សារវាងអ៊ីស្រាអែលនិងក្រុមហាម៉ាស បានឈានដល់ដំណាក់កាលហិង្សា រួចទៅហើយ ដែលបានក្លាយជាទម្លាប់នៅជុំវិញតំបន់នេះ៕