កងឆ្មាំល្បាតឆ្នេររបស់ប្រទេសចិន បាននិយាយថា ខ្លួនកំពុងត្រួតពិនិត្យនាវាល្បាតរបស់ហ្វីលីពីន និងនាវានេសាទដែលបានប្រមូលផ្តុំនៅជុំវិញដែនទឹកជម្លោះ សាប៊ីណា ស្ហូល (Sabina Shoal) ដោយលើកឡើងពី «អធិបតេយ្យភាពដែលមិនអាចប្រកែកបាន» របស់ចិនលើប្រជុំកោះ ស្រ្ពាតលី (Spratly) ក្នុងសមុទ្រចិនខាងត្បូង។

អ្នកនាំពាក្យ លោក កាន់ អ៊ី (Gan Yu) បាននិយាយនៅក្នុងសេចក្តីថ្លែងការណ៍មួយកាលពីល្ងាចថ្ងៃអាទិត្យ (០៤ សីហា) ថា ឆ្មាំល្បាតឆ្នេររបស់ប្រទេសចិន បានត្រួតពិនិត្យនាវាទាំងនោះចាប់តាំងពីថ្ងៃសៅរ៍។

លោក Gan បាននិយាយថា ទូកល្បាតពីការិយាល័យធនធានជលផលហ្វីលីពីន និងទូកនេសាទជាច្រើនទៀតបានប្រមូលផ្តុំគ្នានៅក្នុងដែនទឹកក្បែរនាវាហ្វីលីពីន ដែលប្រទេសចិន និយាយថា «បានចតចោលដោយខុសច្បាប់» នៅឯថ្មប៉ប្រះទឹកនោះ។

ឆ្មាំល្បាតឆ្នេរចិនបានបញ្ជាក់ម្តងទៀតថា នាវាដែលចតចោលនេះ «បានបំពាន» អធិបតេយ្យភាពដែនទឹក និងសិទ្ធិ និងផលប្រយោជន៍ដែនសមុទ្ររបស់ចិន ហើយ «បំផ្លាញ» សន្តិភាព និងស្ថិរភាពនៅសមុទ្រចិនខាងត្បូង។ ចិន ហៅដែនទឹក សាប៊ីណា ស្ហូល ថាជាថ្មប៉ប្រះទឹក សៀនពិន (Xianbin) ខណៈហ្វីលីពីនហៅថាដែនទឹក អេស្កូដា ស្ហូល (Escoda Shoal)៕