អ៊ុយក្រែនបានប្រកាសពីការជម្លៀសកុមារ និងអាណាព្យាបាលជាចាំបាច់ពីតំបន់នានានៅតំបន់ភាគខាងកើតនៃទីក្រុង ដូណេត (Donetsk) ជាទីដែលរុស្ស៊ី បាននិងកំពុងអះអាងពីការវាយរុលទៅមុខ។

កាលពីថ្ងៃអាទិត្យចុងសប្ដាហ៍នេះ ប្រទេសរុស្ស៊ី បាននិយាយថា កងកម្លាំងរបស់ខ្លួនបានដណ្តើមយកភូមិក្បែរនោះ បន្ទាប់ពីបានអះអាងថា ភូមិជាច្រើនបានធ្លាក់មកលើកងកម្លាំងរបស់ខ្លួន ក្នុងប៉ុន្មានសប្តាហ៍ថ្មីៗនេះ ។

អភិបាលតំបន់ Donetsk លោក វ៉ាឌីម ហ្វីឡាស្គីន (Vadym Filashkin) របស់អ៊ុយក្រែន បាននិយាយថា សត្រូវកំពុងទម្លាក់គ្រាប់បែកលើទីក្រុង និងភូមិនៃសហគមន៍ទាំងនេះជារៀងរាល់ថ្ងៃ ដូច្នេះ ត្រូវបានក្រុមអាជ្ញាធរ សម្រេចឲ្យជម្លៀសកុមារជាមួយឪពុកម្តាយរបស់ពួកគេ ឬអ្នកតំណាងស្របច្បាប់ផ្សេងទៀត។

លោក ហ្វីឡាស្គីន បានដកស្រង់ប្រភពពីទីក្រុង ណូវ៉ូក្រូដូវកា (Novogrodovka) ប្រហែល ២០គីឡូម៉ែត្រ ពីភូមិ ណូវ៉ូសេលីវកា ភើសា (Novoselivka Persha) ដែលក្រសួងការពារជាតិរុស្ស៊ីបាននិយាយថា ខ្លួនបានដណ្ដើមយកកាលពីថ្ងៃអាទិត្យ។

ទីភ្នាក់ងារសារព័ត៌មានរុស្ស៊ី TASS បានដកស្រង់ប្រភពពីក្រសួងខាងលើដោយនិយាយថា អង្គភាពរុស្ស៊ីបានកម្ចាត់កងពលតូចអ៊ុយក្រែនចំនួនបួន ហើយ សត្រូវបានបាត់បង់ទាហានរហូតដល់ ៩៥ នាក់ និងឃ្លាំងរំសេវចំនួនពីរ ។

អភិបាលតំបន់ខាងលើបាននិយាយថា កុមារចំនួន ៧៤៤ នាក់ និងគ្រួសាររបស់ពួកគេត្រូវជម្លៀស ចេញពីលំនៅឋានទៅកាន់តំបន់ចំនួន ៤ របស់អ៊ុយក្រែន៕