វិបត្តិទឹកនៅតំបន់ហ្កាហ្សាស្រ្ទីប កាន់តែអាក្រក់ខ្លាំងទៅៗ នៅពេលដែលកងទ័ពអ៊ីស្រាអែល បានបំផ្ទុះអណ្តូងទឹករាប់សិបកន្លែង ដែលជំរុញឱ្យអ្នកជម្លៀសខ្លួនស្វែងរកមធ្យោបាយផ្សេងៗទៀតដើម្បីបានទឹកសម្រាប់ប្រើប្រាស់ប្រចាំថ្ងៃ ហើយការជីកកកាយដីខ្សាច់ គឺជាវិធីមួយដែលអ្នកស្រុកអាចរកទឹកនៅក្រោមដីដើម្បីប្រើប្រាស់។

អ្នកស្រុកប៉ាឡេស្ទីនជាច្រើនបាននាំគ្នាជីកអណ្តូងទឹកសម្រាប់ជនភៀសខ្លួនដោយប្រើវិធីសាស្រ្តបុរាណបែបនេះ ដោយទឹកត្រូវបានដងចេញពីក្នុងនោះដោយប្រើខ្សែពួរ ខណៈជនភៀសខ្លួន និងកុមារតម្រង់ជួរចាំយកទឹកទៅប្រើប្រាស់។

អ្នកស្រុកម្នាក់បាននិយាយថា «អណ្តូងនេះត្រូវបានខួងបន្ថែមលើអណ្តូងចំនួន ៣ផ្សេងទៀត ដើម្បីផ្គត់ផ្គង់តម្រូវការទឹកក្នុងតំបន់ដោយសារតែកង្វះខាតយ៉ាងខ្លាំង។ អណ្តូងទាំងនេះមិនគ្រប់គ្រាន់សម្រាប់តម្រូវការរបស់ប្រជាជនទាំងអស់នៅទីនេះទេ ហើយយើងត្រូវការការផ្គត់ផ្គង់ទឹកបន្ថែមទៀត»។

កង្វះខាតទឹកផឹកយ៉ាងធ្ងន់ធ្ងរនៅតំបន់ហ្កាហ្សា បង្កជាបញ្ហាប្រឈមដ៏ធំបំផុតមួយដល់សុខភាពប្រជាជន ជាពិសេសជាមួយនឹងកម្ដៅដ៏ខ្លាំងក្លានៅក្នុងរដូវក្តៅនេះ។ ទឹកកខ្វក់បណ្តាលឱ្យមានការឆ្លងមេរោគក្នុងពោះវៀនជាមួយនឹងការក្អួត និងរាគ ហើយក៏នាំឱ្យបាត់បង់ជាតិទឹកផងដែរ។

នៅពេលដែលសង្រ្គាមនៅតែបន្តសម្រាប់ខែទីដប់ តំបន់ហ្កាហ្សា បានបាត់បង់សមត្ថភាពផលិតទឹកស្ទើរតែទាំងអស់របស់ខ្លួន ដោយ ៨៨ភាគរយនៃអណ្តូងទឹករបស់តំបន់នេះ និងរោងចក្រចម្រោះទឹកទាំងអស់ត្រូវបានខូចខាត ឬបំផ្លាញ នេះបើយោងតាមរបាយការណ៍ថ្មីៗនេះដោយអង្គការប្រឆាំងភាពក្រីក្រ អកស៍ហ្វាម (Oxfam) របស់ចក្រភពអង់គ្លេស៕