មន្ត្រីសុខាភិបាលតំបន់ហ្កាហ្សា បាននិយាយថា ការវាយប្រហារតាមអាកាសរបស់អ៊ីស្រាអែល បានធ្លាក់ទៅលើទីតាំងច្រើនកន្លែងនៅតំបន់ហ្កាហ្សា កាលពីថ្ងៃអាទិត្យ រួមទាំងជំរំតង់ នៅក្នុងមន្ទីរពេទ្យមួយកន្លែងនៅភាគកណ្តាលតំបន់ហ៊ុមព័ទ្ធមួយនេះ។ការវាយប្រហារ បានសម្លាប់មនុស្សយ៉ាងហោចណាស់៣៥នាក់ និងរាប់សិបនាក់ផ្សេងទៀតរងរបួស។

វីដេអូដែលទទួលបានដោយសារព័ត៌មាន Reuters បង្ហាញពីក្រុមពលរដ្ឋប៉ាឡេស្ទីន បានគប់ធុងទឹក និងប្រើប្រាស់បំពង់ពន្លត់អគ្គិភ័យ ដើម្បីពន្លត់ភ្លើងដែលបានឆាបឆេះបន្ទាប់ពីការវាយប្រហារ។ យោធាអ៊ីស្រាអែល បាននិយាយថា ខ្លួនកំពុងដាក់គោលដៅទៅលើក្រុមសកម្មប្រយុទ្ធដែល «ធ្វើសកម្មភាពភេរវកម្ម» ហើយការបំផ្ទុះជាបន្តបន្ទាប់ត្រូវបានគេកំណត់អត្តសញ្ញាណ ដែលបង្ហាញថាមានអាវុធជាច្រើននៅក្នុងតំបន់នេះ។ បរិវេណមន្ទីរពេទ្យ មានមនុស្សរាប់ពាន់នាក់ ជាអ្នកដែលបានភៀសខ្លួនចេញពីការប្រយុទ្ធគ្នានៅក្នុងតំបន់ផ្សេងៗនៅហ្កាហ្សា។

លោក បាននិយាយថា មនុស្សជាច្រើនកំពុងដេកលង់លក់នៅពេលគ្រាប់រ៉ុក្កែតបានវាយប្រហារ ដោយធ្វើឲ្យជំរំតង់ឆាបឆេះ។ មន្ត្រីប៉ាឡេស្ទីនបាននិយាយថា ការវាយប្រហារតាមអាកាសរបស់អ៊ីស្រាអែល ដាច់ដោយឡែកមួយទៀត បានវាយប្រហារលើសាលារៀនចំនួនពីរកន្លែងក្នុងទីក្រុងហ្កាហ្សា។ យោធាអ៊ីស្រាអែល និយាយថា ខ្លួនបានវាយប្រហារបរិវេណយោធារបស់ក្រុមហាម៉ាស ដែលបានបង្កប់ខ្លួននៅក្នុងសាលារៀនទាំងពីរកន្លែងនេះ។

វីដេអូបង្ហាញសាកសពនៅរាយប៉ាយក្នុងទីធ្លាសាលារៀនមួយ ខណៈពលរដ្ឋប្រញាប់ប្រញាល់ទៅជួយអ្នករងរបួស។ ការវាយប្រហារ កើតឡើងមួយថ្ងៃបន្ទាប់ពីកិច្ចចរចាបទឈប់បាញ់នៅទីក្រុងគែរ បញ្ចប់ទៅដោយគ្មានលទ្ធផល។ នាយករដ្ឋមន្ត្រីអ៊ីស្រាអែល លោក Benjamin Netanyahu បានដាក់កំហុសលើក្រុមហាម៉ាស ចំពោះកិច្ចព្រមព្រៀងដែលជាប់គាំងជាយូរមកហើយ ដើម្បីបញ្ចប់សង្គ្រាមនៅតំបន់ហ្កាហ្សា និងដោះលែងចំណាប់ថ្នូរអ៊ីស្រាអែល។

លោកនិយាយថា ក្រុមហាម៉ាស ពុំបានព្រមព្រៀងចំពោះលក្ខខណ្ឌជាមូលដ្ឋានភាគច្រើននៃផែនការនេះទេ។ អ៊ីស្រាអែល កំពុងត្រៀមទប់ទល់ទៅនឹងការរីកធំកាន់តែខ្លាំង បន្ទាប់ពីការធ្វើឃាតមេដឹកនាំក្រុមហាម៉ាស លោក Ismail Haniyeh នៅក្នុងទីក្រុងតេអេរ៉ង់។